Sjálfstæðisflokkurinn braut fjarskiptalög

Sjálfstæðisflokkurinn braut lög um fjarskipti er hann sendi sms-skilaboð fyrir beina markaðssetningu á kjördag 2014.

Að auki braut flokkurinn gegn lögunum með því að hringja í númerið þrátt fyrir að það væri merkt þannig í símaskrá að óskað væri eftir að fá ekki símtöl sem eru liður í markaðssetningu. Þetta kemur fram í ákvörðun Póst- og fjarskiptastofnunar.

Í skilaboðunum stóð meðal annars: „Ertu buin/n ad kjosa? Ef ekki tha verdur kjorstodum lokad kl. 22:00. Setjum X vid D. XD!“

Meðlimur í Heimdalli, félagi ungra sjálfstæðismanna í Reykjavík, taldi sig ekki hafa veitt samþykki sitt til að taka á móti slíkum sendingum og kvartaði til Póst- og fjarskiptastofnunar. Hún taldi samskiptin falla undir beina markaðssetningu.

Sjálfstæðisflokkurinn hafi ekki sýnt fram á að hafa aflað fyrir fram samþykkis fyrir sendingu rafrænna skilaboða.

Þórður Þórarinsson, framkvæmdastjóri Sjálfstæðisflokksins, segir úrskurðinn koma flokknum á óvart.

„Verði úrskurðurinn staðfestur mun það hafa mikil áhrif á starfsemi allra frjálsra félaga í landinu, bæði stjórnmálasamtaka og allra annarra félaga,“ segir Þórður sem kveður Sjálfstæðisflokkinn munu liggja yfir ákvörðuninni með lögfræðingum sínum.

Þórður telur ekki ólíklegt að úrskurðurinn verði kærður til áfrýjunarnefndar.