Ljósið 10 ára

Ljósið er sjálfseignarstofnun sem verður 10 ára á þessu ári. Ljósið er endurhæfingar- og stuðningsmiðstöð fyrir krabbameinsgreinda og aðstandendur þeirra. Sem sjálfseignarstofnun þarf Ljósið mjög á góðum styrktaraðilum að halda til að láta enda ná saman og fer mikil orka hjá félaginu í að afla fjármagns til rekstursins.

Þó að 10 ár séu ekki langur tími hefur Ljósið nú þegar skilað frábæru starfi fyrir krabbameinssjúklinga og reyndar fyrir samfélagið allt. Ég átti því láni að fagna fyrir nokkrum árum að vera leiddur inn fyrir þröskuldinn á Langholtsveg 43, en þar er Ljósið til húsa. Ég hafði endurgreinst vegna krabbameins í blöðruhálskirtli nokkru áður og átti mjög erfiðan tíma og hafði leitað aðstoðar, þar sem ég hélt að aðstoð væri að finna, en hafði ekki erindi sem erfiði og eftir nokkrar heimsóknir gerði ég mér engar vonir um einhverja aðstoð væri að fá hvorki þarna né annars staðar. Þetta var því aðallega til að friða konuna mína.

Þegar inn var komið var okkur tekið með mikilli alúð, og okkur boðið sæti og að þiggja kaffisopa. Við vorum spurð hvort ekki mætti segja okkur frá starfsemi Ljóssins og skoða húsnæðið. Þetta var allt sjálfsagt, þar sem við höfðum ekkert annað fyrir stafni. Var skýrt út fyrir okkur hvernig starfsemin hjá Ljósinu væri í stuttu máli og við fengum að skoða aðstöðuna hjá þeim. Ekki var þetta nóg til að ég samfærðist, enda stutt frá því að mér hafði mistekist að leita mér aðstoðar, en þannig vildi til að sama kvöld var að hefjast námskeið fyrir karlmenn með krabbamein og má segja að dagurinn hafi farið í það að taka ákvörðun um hvort ég þyrði að mæta, en til allrar lukku lét ég verða af því og var námskeiðið mjög fróðlegt og uppbyggjandi. Var mér í framhaldi boðið að sækja fleiri námskeið, sem ég þáði, og má segja að þessi tími hjá Ljósinu hafi gjörbreytt líðan minni.

Hjá Ljósinu starfa sálfræðingar, hjúkrunarfræðingar, iðjuþjálfar, sjúkraþjálfarar, næringarráðgjafar, markþjálfi og íþróttafræðingur. Þar fyrir utan er fjöldi fólks sem kemur að ýmsum þáttum starfsins, eins og ýmsum námskeiðum við ýmis konar handverk og sköpun. Þessi upptalning sýnir hve starfið hjá Ljósinu er fjölbreytt. Þessi breiði hópur ráðgjafa og fræðinga gerir starfið mjög markvisst, þar sem allir fá fræðslu og ráðgjöf sem hæfir hverjum og einum. Ég get borið vitni um ágæti þessa starfs hjá Ljósinu og hve skipulagt starfið er, og er ég hálfundrandi yfir því hve hægt er að ná góðum árangri með svo erfiðan sjúkdóm sem krabbameinið er. Í mínu tilfelli er reyndar um ólæknandi sjúkdóm að ræða, en Ljósið, eða öllu heldur hið frábæra starfsfólk þess, hefur kennt mér að lifa með sjúkdómnum og verð ég því Ljósinu ævinlega þakklátur.

Sem dæmi má geta þess að Ljósið hefur nú þegar útskrifað sjúklinga, sem sýnir hve starf þess er markvisst. Ég væri alveg tilbúinn að vera í þeim hópi en því miður er því ekki að heilsa í mínu tilfelli. Það hlýtur að vera ánægjulegt að geta losnað við sjúkdóminn og tekist á við lífið aftur með nýju hugarfari. Að lokum vil ég enn og aftur þakka starfsfólki Ljóssins fyrir frábært starf og óska því allra heilla í framtíðinni og að það haldi áfram að dafna og gera okkur krabbameinssjúklingum auðveldara að lifa því lífi sem við lifum nú.