Fyrirmyndardagurinn

Fyrirmyndardagurinn verður haldinn þann 17. apríl næstkomandi og stendur Vinnumálastofnun fyrir deginum. Markmiðið dagsins er að atvinnuleitendur með skerta starfsgetu fái aukin og fjölbreytt tækifæri á vinnumarkaði. Á Fyrirmyndardeginum bjóða fyrirtæki og stofnanir atvinnuleitendum sem hafa fengið fá tækifæri á vinnumarkaði að vera gestastarfsmenn í fyrirtækjunum í einn dag eða hluta úr degi. Afar mikilvægt er að fyrirtæki og stofnanir taki þátt í Fyrirmyndardeginum og gefi þannig atvinnuleitendum tækifæri á að kynna sér störf innan ólíkra fyrirtækja.

Í fyrra var Fyrirmyndardagurinn haldinn í fyrsta sinn á Íslandi og gekk dagurinn vonum framar og fengu 46 atvinnuleitendur með skerta starfsgetu tækifæri á að vera gestastarfsmenn í 35 fyrirtækjum og stofnunum. Störfin voru fjölbreytt og má þar nefna störf í leikskólum, stjórnsýslu, verslunum, iðnaði, skrifstofum, banka og þjónustu. Almenn ánægja var hjá fyrirtækjum með þetta framtak og fengu fjórir gestastarfsmenn vinnu í kjölfar dagsins en aðrir fengu tækifæri til þess að kynnast nýju starfsumhverfi og auka víðsýni sem nýtist í framhaldi í atvinnuleitinni. Gestastarfsmennirnir voru afar ánægðir með að fá tækifæri til að prófa ný störf og í sumum tilfellum var um draumastarfið að ræða og einnig mynduðust ný kynni sem er ómetanlegt.

Ávinningur dagsins er ekki einungis fyrir atvinnuleitendur heldur fá þátttökufyrirtækin tækifæri til þess að kynna störf innan sinna fyrirtækja og um leið að kynnast styrkleikum þeirra sem eru með skerta starfsgetu.

Við hvetjum alla til þess að skoða Facebook-síðu Fyrirmyndardagsins en þar eru fréttir, upplýsingar, myndir og annað tengt deginum. Þar má auk þess senda inn fyrirspurnir eða hafa samband við Vinnumálastofnun.

Hlökkum til að eiga skemmtilegt samstarf við atvinnuleitendur og fyrirtæki þann 17. apríl næstkomandi.

Hefurðu sögu að segja eða skoðun að deila? Ef svo er sendu okkur grein ásamt mynd á netfangið ritstjorn(hja)visir.is