Heimsþekktur Everestfari á Íslandi

Heimsþekkti fjallgöngumaðurinn David Breashears er einn af fyrirlesurum á Háfjallakvöldi í Eldborgarsal Hörpu á sunnudagskvöld.

„David er einn þekktasti fjallgöngumaður sem hingað hefur komið. Hann var fyrstur manna til að taka hreyfimynd á Everest en fjallið hefur hann klifið fimm sinnum,“ segir Tómas Guðbjartsson læknir, sem einnig mun halda fyrirlestur á Háfjallakvöldinu.

Breashears mun meðal annars ræða ferð sína á Everest í maí 1996, þegar átta fjallgöngumenn létu lífið. „Hann mun fara yfir hvað gerðist þarna á fjallinu og hvað varð mögulega til þess að svo reynslumiklir menn tóku þessa ákvörðun að halda áfram upp þegar aðstæður buðu ekki upp á það,“ segir Tómas, en söguna af Everestförunum sem létust þekkja einhverir úr bókinni Into Thin Air.

„Baltasar Kormákur er að vinna að kvikmynd um þennan atburð. Hann hefur kafað djúpt í þessa sögu og mun koma með sína hlið sem lista- og kvikmyndagerðarmaður,“ bætir Tómas við, en Baltasar verður einn fyrirlesara á Háfjallakvöldinu.

„Ég mun svo ásamt Ólafi Má Björnssyni fara yfir læknisfræðilegu hliðina á þessu atviki og skoða til dæmis fjallaveiki og hvaða áhrif súrefnisskortur hefur haft á dómgreind þeirra,“ segir Tómas.