HönnunarMars er handan við hornið

Tanja Huld Levý Guðmundsdóttir, fata- og textílhönnuður sýnir sína fyrstu fatalínu, Eitur í flösku í Gallerí Ekkisens, Bergstaðarstræti 25b. Opnunin verður þann 11. mars klukkan 18.00 og sýningin verður opin alla daga til 15. mars frá klukkan 13.00

„Mér finnst hugmyndavinnan vera eitt það skemmtilegasta og mikilvægasta í ferlinu,“ segir Tanja Huld. „Ég byrja á að vinna þannig að ég bý til eitthvað konsept og út frá því þá tek ég myndir, les bækur, horfi á heimildarmyndir og bara allskonar. Allt sem mér dettur í hug í sambandi við konseptið.“ 

En línunni segir Tanja mega lýsa sem könnun á eigin fagurfræði. „Í þessu tilfelli fór ég að safna myndum af olíubrák og gerði litagreiningu út frá því.“

Fatalínan ber nafnið Eitur í flösku. „Nafnið er í rauninni tilvísun í bæði leikinn og eitrið sem olían er í hafinu.“



Skissubókin

„Mér finnst mjög mikilvægt að vera með skissubók og vera svolítið hömlulaus og setja allt inn í hana sem tengist verkefninu,“ segir hún og bætir við að skissubókin sé einskonar biblía hönnuðarins. 

Óvenjulegur efniviður

„Ég fór að skoða efni sem notað er í flugu­hnýtingar. Ég fékk bara hugmyndina út frá flatfisknum. Ég nota þetta í sumar flíkurnar,“ segir Tanja um glitrandi efniviðinn.

Fjölbreytt efni

Efnin eru handþrykkt af Tönju en hún notast einnig einnig við digital-prent. „Flest efnin eru handþrykkt og svo læt ég líka digital-prenta fyrir mig og þrykki svo ofan á það.“

Kristín Sigfríður Garðarsdóttir, keramiker sýnir í Húrra Reykjavík ásamt Ólöfu Erlu Bjarnardóttur, keramiker. Sýning þeirra ber nafnið Húrra Keramik og verður opnuð þann 12. mars klukkan 17.00. Sýningin verður opin frá 12. mars til 15. mars alla daga frá klukkan 11.00.

Innblásturinn

„Það að hræra í hafragrautnum á morgnana veitir mér til dæmis innblástur að teikningunum að sleifum og göfflum sem ég brenni síðan í glerunginn,“ segir Kristín sem veltir fyrir sér hversdagslegri stemningu og formum í verki sínu. 

„Hversu langt ég get teygt og togað diskinn án þess að eyðileggja formið. Hversu mikið get ég kreist og kramið bollann svo úr verði spennandi form?“ eru meðal spurninga sem Kristín veltir fyrir sér. „Annar sonur minn kallaði verkefnið Ófærur því diskarnir minntu hann á skaflana sem hafa verið að blása til og frá í vetur og skapa ótrúlega falleg form.“

Skissubókin

Í skissubók Kristínar má sjá rissaðar myndir af eldhúsáhöldum sem bollarnir og skálarnar verða skreytt með áður þau fara í síðasta skipti í brennsluofninn.

Verk Í vinnslu

Bollar og diskar bíða eftir að gafflar og skeiðar verði teiknuð á þá.

„Undanfarin ár hef ég töluvert unnið með frekar hversdags­lega stemningu, snerting af ýmsum toga hefur verið mér hugleikin. Til dæmis hvernig bollinn fer í hendi meðan maður veltir honum um í lófan­um,“ segir Kristín.