Stór skref með þróunarsjóði innflytjendamála

Á síðustu árum hafa mörg frambærileg og mikilvæg verkefni hlotið styrki úr þróunarsjóði innflytjendamála, t.d. rannsóknir á stöðu húsnæðismála innflytjenda í Reykjavík, móðurmálskennsla fyrir börn innflytjenda, rannsókn á aðstæðum innflytjenda á vinnumarkaði og hönnun námskeiðs fyrir samfélagstúlka.

Þetta eru aðeins nokkur dæmi af fjölmörgum, en sjóðurinn hefur frá árinu 2007 unnið að þeim markmiðum að stuðla að samfélagi þar sem allir geta verið virkir þátttakendur, óháð þjóðerni og uppruna, og að auðvelda gagnkvæma aðlögun innflytjenda og samfélagsins alls, okkur öllum til hagsbóta.

Áhersla á þróunarverkefni

Áherslur þróunarsjóðsins í ár eru í samræmi við markmið og áherslur þingsályktunartillögu um framkvæmdaáætlun í málefnum innflytjenda 2015-2019, sem Eygló Harðardóttir, félags- og húsnæðismálaráðherra, mun leggja fram á Alþingi á komandi vikum, en innflytjendaráð hefur, ásamt starfsfólki ráðuneyta og stofnana, unnið að henni í umboði og eftir fyrirmælum ráðherra. Í fyrsta lagi verður lögð áhersla á „þróunarverkefni sem styðja við félög sem hafa það að markmiði að efla virka þátttöku innflytjenda í samfélaginu og vinna að hagsmunamálum þeirra“. Ein jákvæðasta þróun undanfarinna ára í málaflokknum er sú mikla gróska sem verið hefur hjá félags- og hagsmunasamtökum innflytjenda, en slík samtök gegna gríðarlega mikilvægu hlutverki og er það eindreginn vilji okkar að styðja þau áfram á næstu árum.

Í öðru lagi er áhersla lögð á „þróunarverkefni sem styrkja nærþjónustu við innflytjendur á öllum stigum stjórnsýslunnar og í samfélaginu almennt“. Það er metnaðarmál fyrir okkur að vinna að bættri þjónustu við innflytjendur á öllum stigum stjórnsýslunnar, og höfum við fundið sterkt fyrir því sama hjá fagfólki sem vinnur á sviði innflytjendamála. Í þriðja lagi er áhersla sjóðsins á „þróunarverkefni og rannsóknir sem beinast að auknum tækifærum innflytjenda til endurmenntunar og starfstengds náms og stuðla almennt að bættri stöðu þeirra á vinnumarkaði“. Við teljum mikilvægt að sérstaklega sé hugað að þörfum innflytjenda við skipulag náms á öllum stigum, til að tryggja að þeir njóti í raun jafnra tækifæra og aðrir. Að sama skapi er mikilvægt að vinna að því að auðvelda innflytjendum að nýta menntun sína og hæfileika á vinnumarkaði, en það er alltof algengt að aðgangshindranir hérlendis komi í veg fyrir að svo sé.

Síðasta áhersla sjóðsins í ár er „þróunarverkefni sem sýna hvernig fjölmenning eykur félagsauð og styrkir innviði samfélagsins“. Undanfarna mánuði og ár hefur því miður borið of mikið á neikvæðri umræðu í samfélaginu, sem á engan rétt á sér og endurspeglar ekki hversu jákvæð fjölmenning er fyrir íslensk samfélag og allt það jákvæða sem innflytjendur koma með til íslensks samfélags. Þegar fólk af ólíkum uppruna og bakgrunni tekst í sameiningu á við erfiðustu verkefni samtímans, náum við fram betra og réttlátara samfélagi. Þessa meginreglu hefur innflytjendaráð haft að leiðarljósi í störfum sínum við þróunarsjóð og framkvæmdaáætlun – og á því verður engin breyting.