Segir ríki og sveit stefna friði í voða

„Ríki og sveitarfélög hafa mótað nýja launastefnu sem stefnir friði á vinnumarkaði í voða,“ segir Þorsteinn Víglundsson, framkvæmdastjóri Samtaka atvinnulífsins (SA), í leiðara fréttabréfs SA.

Sama segir hann hafa gerst áður, svo sem í samningum við BHM 1989. Þeir hafi að lokum verið teknir úr sambandi með lögum, svo unnt væri að gera þjóðarsáttarsamningana. „Ríki og sveitarfélög hafa hleypt hér af stað gamalkunnu höfrungahlaupi á vinnumarkaði sem ekki sér fyrir endann á,“ segir hann.

Á sama tíma geri úrlausn komandi kjarasamninga erfiðari að ríkisstjórnin hafi alveg horfið frá þríhliða samstarfi við aðila vinnumarkaðarins.

Síðustu misseri segir Þorsteinn hins vegar hafa einkennst af vaxandi átökum aðila vinnumarkaðar og ríkisstjórnar.

Hann bendir á að ekki hafi verið staðið við lækkun tryggingargjaldsins og að tekjustofn fæðingarorlofssjóðs hafi verið skertur sem og framlag til jöfnunar örorkubyrðar lífeyrissjóða og réttur til atvinnuleysisbóta. Að auki hafi stjórnin ekki virt lögbundna skuldbindingu sína við starfsendurhæfingarsjóðinn Virk.

Á vef fjármálaráðuneytisins í gær var því síðdegis hafnað að kjarasamningar ríkisins hafi raskað jafnvægi á vinnumarkaði og að hækkanir á launum ríkisstarfsmanna hafi verið úr takti við aðra launaþróun. 

Í samantekt ráðuneytisins um kjaraþróun starfsmanna ríkisins í samanburði við almennan vinnumarkað segir að samningar ríkisins í fyrra hafi tekið mið af þeirri stefnumótun sem aðilar á vinnumarkaði hafi komið sér saman um.

„Undantekningar frá þessu eru afmarkaðar og taka til tiltölulega fámennra hópa þar sem samið var um grundvallarbreytingar á þeirri starfsemi sem í hlut á,“ segir þar.

Samanburður á launaþróun starfsmanna ríkisins við þróunina á almennum markaði sýni að ríkið hafi ekki verið leiðandi í þeim efnum.

„Ef litið er til launaþróunar frá þriðja ársfjórðungi 2013 til þriðja ársfjórðungs 2014 hafa laun ríkisstarfsmanna hækkað um 6,8 prósent sem er meira en á almennum vinnumarkaði en þar hækkuðu laun um 5,9 prósent,“ segir í samantekt ráðuneytisins, en um leið er bent á að undanfarin ár hafi laun starfsmanna ríkisins hækkað minna en á almennum vinnumarkaði.

Hóparnir hafi fylgst að í þróun milli 2005 og 2010, en frá þeim tíma hafi dregið í sundur með þeim og laun hækkað meira á almennum vinnumarkaði. „Og breytir þróunin á síðasta ári ekki þeirri mynd.“