Össur kynnir gervifætur stýrða með hugarafli

Össur hefur þróað nýja tækni sem gera mun fólki með gervifætur kleift að stýra með hugarafli. Össur segist vera fyrsta fyrirtækið í heiminum til að kynna þessa tækni fyrir neðri útlimi. Tveir Íslendingar með gervifætur hafa verið með hana í prófun í rúmt ár og munu prófanir halda áfram.

Jón Sigurðsson, forstjóri Össurar, segir að nýjungin sé „mikilvægt tæknilegt framfaraskref og fánaberi næstu kynslóðar af gervigreindartækni.“

„Með því að aðlagast ekki aðeins meðvituðum hreyfingum notandans heldur einnig ómeðvituðum hreyfingum hans erum við nær því en nokkru sinni fyrr að búa til gervifætur sem starfa algerlega með notandanum og eru nær fullkomin framlenging á þeim sem misst hafa útlim.“

Tveir Íslendingar fyrstir til að prófa tæknina

Að sögn Þorvaldar Ingvarssonar, doktors í bæklunarskurðlækningum og framkvæmdastjóra þróunarsviðs Össurar, byrja hreyfingar hjá ófötluðum í undirmeðvitundinni sem sendir taugaboð í réttan líkamshluta og virkjar viðeigandi vöðva til að hreyfast. Tækninýjungin frá Össuri líkir eftir þessu ferli hjá aflimuðum nema að hjá þeim enda taugaboðin í IMES nemanum sem í kjölfarið sendir þau rakleiðis áfram í gervifótinn.

„Tæknin gerir það að verkum að upplifun notandans verður næmari og samhæfðari. Niðurstaðan er sú að notandinn getur hreyft gervifótinn samstundis hvernig sem hann vill. Notandinn þarf ekki að hugsa sérstaklega um að hann ætli sér að hreyfa gervifótinn því ósjálfráðu viðbrögðum líkamans er sjálfkrafa breytt í rafboð sem stjórna gervifætinum,“ segir Þorvaldur.

„Össur er leiðandi fyrirtæki í þróun og framleiðslu gervifóta og stoðtækja á heimsvísu og við verjum miklu af tíma og fjármunum fyrirtækisins til nýsköpunar. Við erum staðráðin í því að leita stöðugt nýrra uppgötvana til að hjálpa fleirum að njóta lífsins án takmarkana.“

Össur segir að í tækninni felst að sérstökum nema (e. surgically implanted myoelectric sensor, IMES) er komið fyrir í vöðva og tekur neminn við taugaboðum frá heila og sendir samstundis áfram í gervifótinn sem framkvæmir hreyfinguna sem notandinn hafði ómeðvitað hugsað sér að framkvæma. Neminn tengist við nýjustu gervifætur Össurar sem eru með gervigreind (e. bionic prosthesis), þ.e. þeir eru „snjallir“ og geta aðlagast göngulagi og -hraða notandans en krefjast enn meðvitaðrar hugsunar af hálfu notandans.