Sölvi svarar fyrir sig: „Ólíkt Guðmundi hef ég aldrei verið í stöðu til að stela peningum“

Í síðustu viku tilkynnti fjölmiðlamaðurinn Sölvi Tryggvason að hann væri hættur að greiða í lífeyrissjóð þar sem skammarlegt væri hve lágar lífeyrisgreiðslur til eldri borgara væru.

Í kjölfarið lét Guðmundur Gunnarsson, fyrrverandi formaður Rafiðnaðarsambandsins og núverandi varaformaður lífeyrissjóðsins Stafa, Sölva heyra það og sagði hann stela af samborgurum sínum.

Nú hefur Sölvi svarað fyrir sig í nýrri færslu á vefsvæðinu Spyr og segir að Guðmundur hafi staðfest allt sem fram kom í upprunalegum pistli sínum, en þar sagði: ,,Þegar einhver vogar sér að gagnrýna eitthvað, stökkva upp varðhundar sem hegða sér eins og það sé verið að gagnrýna barnið þeirra.”

„Ótrúlegt nokk voru ekki liðnir nema nokkrir klukkutímar þegar einn af þessum varðhundum, Guðmundur Gunnarsson, stökk úr fylgsni sínu,“ segir Sölvi í nýju færslunni.

Sjá einnig: Sölvi Tryggvason er hættur að borga í lífeyrissjóð

Sölvi segir að almennt rífist hann ekki við fólk sem færi umræðuna á jafn lágt plan Guðmundur sem gagnrýndi Sölva fyrir „glanslífstíl“ á kostnað lífeyrisþega. „Það er hins vegar tilefni til að staldra aðeins við þegar Guðmundur, sem þekkir kerfið út og inn, ákveður að fara beint í að beita fyrir sig öryrkjum og láglaunafólki. Með eigin rökum viðurkennir hann semsagt að hundruða milljarða tap lífeyrissjóðanna eftir hrun sé borgað af öryrkjum og láglaunafólki,“ segir fjölmiðlamaðurinn.

Aldrei verið í aðstöðu til að stela peningum

„Ólíkt Guðmundi hef ég aldrei verið í stöðu til að stela peningum frá þessum hópum, en ég vona að ef ég hefði verið innanbúðarmaður í lífeyrissjóðakerfinu í áraraðir væri ég aðeins varkárari áður en ég sakaði fólk um að stela af samborgurum sínum. Þegar maður er með höndina upp að olnboga í nammikrukkunni og munnvikin útötuð af sykri getur verið þægilegt að benda í allar áttir, en allt sæmilega skynsamt fólk sér í gegnum það. Ef ekki væri um að ræða svo stóra hagsmuni væri hreinlega krúttlegt að horfa upp á þessa afneitun,“ segir Sölvi.

Þá bætir Sölvi við að ef í óefni færi og hann gæti ekki lagt nógu mikið fyrir til elliáranna hefði hann gott fólk á bak við sig sem styddi hann í hans baráttu.