Setti myndir af barnsmóður sinni í kynferðislegum stellingum á Deildu

Ríkissaksóknari hefur höfðað mál á hendur karlmanni á þrítugsaldri á Selfossi fyrir gróf brot í garð barnsmóður sinnar og fyrverandi sambýliskonu árið 2014. Þá er hann einnig ákærður fyrir íkveikju sem skapaði verulega hættu. 

Meint brot mannsins gegn barnsmóður sinni átti sér stað að kvöldi fimmtudagsins 23. janúar. Er hann ákærður fyrir stórfelldar ærumeiðingar og brot gegn blygðunarsemi með því að hafa sett myndir af konunni í kynferðislegum athöfnum á skráarskiptasíðuna Deildu.net. 

„Mað háttsemi sinni móðgaði og smánaði ákærði (konuna) auk þess að særa blygðunarsemi hennar,“ eins og segir í ákæru.

Skapaði almannahættu

Maðurinn er einnig ákærður fyrir brennu með því að hafa snemma morguns laugardaginn 22. febrúar á Selfossi valdið eldsvoða sem hafði í för með sér almannahættu. 

Á hann að hafa kveikt í rúmi í svefnherbergi íbúðar á neðri hæð þaðan sem eldurinn breiddist út. Miklar bruna- og reykskemmdir urðu í herberginu og skemmdir á allri íbúðinni sökum hita og reyks, auk þess sem veruleg hætta var á meiri útbreiðslu elds og eignatjóni í íbúðinni eins og segir í ákærunni.

Íbúi á efri hæð hússins hóf slökkviaðgerðir um leið og hann varð eldsins var og hélt þeim áfram þar til slökkviliðið kom á vettvang og réði niðurlögum eldsins.

Þá er maðurinn ákærður fyrir að hafa hrækt á lögreglumann í gegnum opna lúgu á klefahurð í fangageymslu lögreglustöðvarinnar á Selfossi kvöldið eftir að eldurinn kom upp.

Málið er til meðferðar við Héraðsdóm Suðurlands á Selfossi. Maðurinn neitar sök.