Vertinn á Litlu kaffistofunni fjúkandi illur út í veðurfræðinga

Stefán Þormar Guðmundsson, vertinn á Litlu kaffistofunnar, er ósáttur við að veðurfræðingar séu að segja fólki hvort fært sé yfir Hellisheiðina eða ekki.

„Nei, stundum er ég ekki kátur með þá,“sagði Stefán í þættinum Í bítið á Bylgjunni. „Þeir eru að lýsa veðrinu og segja frá því og það er þeirra starf. En það er  orðin svolítil forræðishyggja þegar þeir eru að segja hvenær eigi að ferðast og hvenær eigi ekki að ferðast. Vegagerðin sér um það og það eru bílar hér að hreinsa veginn á vegum Ingileifs Jónssonar og þetta er allt gert vel og svo lokar Vegagerðin. Þá koma þeir að kvöldi til og segja að það hvort eigi að ferðast eða ekki að ferðast, myndalegar ungar konur og myndalegir ungir menn.“

Stefán segir veðurfræðinga allt of oft skipta sér af því hvort fólk eigi að vera á ferðinni. Honum finnst að fólk eigi sjálf að ráða því hvort það fari af stað eða ekki. „Þeir eiga bara sleppa því orði að það sé ekkert ferðaveður, ég vil bara að hver og einn meti það hvenær hann fari úr bæ og hvenær hann komi í bæ,“ segir Stefán.

„Með því að veðurfræðingar séu að segja svona eru þeir að gera hálfa þjóðina að einnota guðsgeldingum í ferðalögum, þeir bara hreyfa sig ekki.“Vertinn er einnig ósáttur við að Veðurstofan vari við veðrum sem svo láti ekki sjá sig. „Sem dæmi þá síðasta sunnudag var búið að segja frá því að það yrði leiðindaveður sem kom ekki. Það var leiðinlegt veður en það var ferðaveður,“ segir Stefán.

„Ég er alinn upp í Skaftafellssýslu og þar fóru mjólkurbílar og bílar til Reykjavíkur og alltaf komu þeir til baka en þeir voru lengur á leiðinni en núna enda ekki hreinsað eins vel.“

Aðspurður hvort veðurfræðingar séu ekki að reyna að koma í veg fyrir að vanbúnir bílar fari út í umferðina viðurkennir hann að svo sé. „Auðvitað eru þeir að því en þá eru hinir að gjalda þess sem kunna þetta og geta. Auðvitað eru of margir vanbúnir bílar á götunum sem stoppa oft umferðina.“

En engu síður segist Stefán alltaf hafa komist í vinnuna þau 23 ár sem hann hefur rekið Litlu kaffistofuna óháð veðri og vindum. „ Ég kemst með því að stoppa þegar ég sé ekki en sumir keyra þó þeir sjái ekki neitt og þeir eru alltaf út af veginum eða aftan á næsta bíl en þá er ekki við veðurfræðingana að sakast.“