99 ára plankari á Eyrarbakka

Sigurður Bjarnason, 99 ára heimilismaður á dvalarheimilinu Sólvöllum á Eyrarbakka, hefur vakið mikla athygli fyrir fimi sína því hann gerir sér stundum lítið fyrir og leggst á gólfið og plankar fyrir sig og heimilisfólkið.

Á Sólvöllum eru átján heimilismenn - tólf konur og sex karlar.

Sigurður er frá Hlemmiskeiði á Skeiðum og verður hundrað ára 1. janúar 2016. Hann er nýfluttur á Sólvelli.

Auk þess sem Sigurður sker út klukkur af mikilli snilld þá er hann strax farinn að láta til sín taka í leikfimistímum heimilisfólksins því hann gerir sér lítið fyrir og leggst á gólfið og plankar í fimmtán til tuttugu sekúndur, stundum tvisvar í röð.

Sigurður fer létt með þetta þrátt fyrir háan aldur en hann byrjaði fyrst að planka í síðustu viku.

„Það var íþróttatími hjá konunum hérna þar sem þær sátu á stól og svo kom íþróttakennarinn. Hún sýndi okkur ýmislegt, hún gerði meðal annars þessa æfingu og þá sagði konan við hliðina á mér: „Ég bara mana þig á að gera þetta“, segir hún. Nú ég tók áskoruninni að því að ég taldi að ég gæti þetta,“ segir Sigurður sem gerði æfinguna tvisvar sinnum þar sem taka þurfti mynd af honum í seinna skiptið.

Það er ótrúlegt hvað Sigurður heldur miklum kröftum og er hraustur þrátt fyrir að hann sé að verða eitt hundrað ára. „Já, ég kannski veit ekki á hvað á að kalla hraustur, jú, jú, ég má vera alveg ánægður,“ segir Sigurður.

Kveðast á í sólstofunni

Heimilisfólkinu á Sólvöllum líður greinilega mjög vel þar og margir hittast nokkrum sinnum á dag í sólstofunni og kveðast á.

Laufey Guðmundsdóttir, 95 ára frá Egilsstaðakoti í Flóa, er ein þeirra, en í fréttinni má heyra hvernig hún fer með upphafið að hjónabrag sem hún lærði sem lítil stelpa.