Boko Haram réðust á stórborg í Nígeríu

Hryðjuverkasamtökin, Boko Haram réðust í nótt á borgina Maiduguri í norðausturhluta Nígeríu. Harðir bardagar geisa nú í útjaðri borgarinnar þar sem stjórnarhermenn verjast innrás samtakanna. Borgin hefur mikilvægt hernaðarlegt gildi en Boko Haram reyndi síðast að ná henni á sitt vald í desember 2013 en höfðu ekki erindi sem erfiði.

Tölur um mannfall hafa ekki borist en útgöngubann ríkir nú í borginni. Boko Haram samtökin voru stofnuð árið 2002 og frá 2009 hafa þau gert tíðar árásir í Nígeríu með það að markmiði að stofna íslamskt ríki. Mörg þúsund manns, flestir óbreyttir borgarar hafa verið myrtir af samtökunum á þessum tíma.