Segist hafa fengið þau svör að skipun Gústafs hafi átt að vera sniðug

S. Björn Blöndal, oddviti Bjartrar framtíðar í Reykjavík, segir að Guðfinna Jóhanna Guðmundsdóttir, borgarfulltrúi Framsóknar og flugvallarvina, hafi sagt við sig að skipun Gústafs Níelssonar hafi átt að vera sniðug. Vísir greindi frá skipun Gústafs í sæti varmanns í mannréttindaráði Reykjavíkur í gærkvöldi en hann er yfirlýstur moskuandstæðingur. Tilkynnt var um að það í dag að skipunin yrði afturkölluð.

Vitnar í samtal í gærkvöldi

Á Facebook-síðu sinni segir Björn að hann hafi spurt þær Guðfinnu og Sveinbjörgu Birnu Sveinbjörnsdóttur, oddvita Framsóknar, um skipunina og hvort hann hefði verið á lista flokksins fyrir borgarstjórnarnkosningarnar. „Sveinbjörg svaraði mér því að svo hefði ekki verið og Guðfinna bætti við að hann væri Sjálfstæðismaður,“ segir hann.

„Ég spurði þær þá af hverju þeim hefði fundist góð hugmynd að sækja þennan mann út í bæ og biðja hann sérstaklega um að gerast fulltrúi þeirra. Guðfinna spurði mig á móti hvort allar raddir ættu ekki að heyrast í mannréttindaráði. Svo bætti hún við: "Svo fannst okkur þetta bara sniðugt.",“ segir Björn.

Í gærkvöldi sagði Guðfinna í samtali við Vísi að ekki kæmi að sök þó að Gústaf væri Sjálfstæðismaður og bætti við að „á grundvelli yfirlýsinga í samstarfssáttmála meirihlutans um að hlustað sé á allskonar raddir og þeim skapaður vettvangur þá er það mat borgarfulltrúa Framsóknar og flugvallarvina að skipan hans sem varamanns styðji við þau sjónarmið“.

Ætlar ekki að styðja tilnefningar flokksins

Björn segir að litið svo á að það sé á ábyrgð hvers flokks eða framboðs að skipa fulltrúa í ráð og nefndir og ekki talið það í sínum verkahring að ... það sérstaklega. „Kjósendur hafa veitt flokknum sem tilnefnir umboð til þess,“ segir hann. Björn segist þó hafa komist að þeirri niðurstöðu að það hafi verið mistök að sitja ekki hjá við atkvæðagreiðsluna.

Eftir tilnefningu Gústafs verður þó breyting þar á hjá Birni. „Hér eftir mun ég ekki styðja tilnefningar Framsóknar og flugvallarvina á fulltrúum í ráð, nefndir, starfshópa eða önnur trúnaðarstörf á vegum borgarinnar. Ég vil ekki taka nokkra ábyrgð þessu fólki,“ segir hann.