Menntamálaráðherra dregur RÚV frumvarpið til baka

Menntamálaráðherra hefur dregið frumvarp sitt um óbreytt útvarpsgjald til baka í ríkisstjórn en þess í stað fær Ríkisútvarpið 175 milljónir í aukin framlög á fjárlögum. Alþingi lýkur að öllum líkindum störfum fyrir jólaleyfi með atkvæðagreiðslum á morgun, m.a. um nýja ríkisborgara.

Ríkisstjórnin kom saman til fundar í morgun þar sem meðal annars var rætt um frumvarp menntamálaráðherra um að útvarpsgjaldið lækki ekki á næsta ári eins og núgildandi lög gera ráð fyrir heldur verði óbreytt. Hlé var gert á fundinum upp úr klukkan tíu svo ráðherrar gætu tekið þátt í atkvæðagreiðslum á Alþingi og sagði Bjarni Bendiktsson fjármálaráðherra málið verða tekið fyrir að þeim loknum.

En hvar hefur hnífurinn staðið í kúnni?

„Eigum við ekki bara að segja að þessi skoðun á málefnum RÚV, þar á meðal fjárhagsmálefnunum hafi tekið full langan tíma. Það eigi eftir að botna það sem kom út úr skýrslunni. Við ætlum að ræða þetta hér á fundinum á eftir,” sagði Bjarni.

Illugi Gunnarsson menntamálaráðherra og Kristján Þór Júlíusson heilbrigðisráðherra sátu aðeins lengur inni hjá forsætisráðherra áður en þeir hlupu síðan af stað í atkvæðagreiðsluna á Alþingi þar sem Þróunarstofnun var m.a. endanlega lögð niður.

Að loknum atkvæðagreiðslum hófst ríkisstjórnarfundur á nýjan leik þar sem dró til tíðinda varðandi frumvarp menntamálaráðherra og voru formaður og varaformaður fjárlaganefndar kallaðir á fund oddvita ríkisstjórnarinnar að loknum fundi.

Frumvarp menntamálaráðherra hefur verið til umfjöllunar í ríkisstjórn í um þrjár vikur og eftir alla yfirleguna var ákveðið að hann drægi frumvarpið til baka. Þess í stað verður lögð fram breytingartillaga við fjárlagafrumvarpið sem kynnt var í fjárlaganefnd síðdegis og segir Illugi að síðan liggja fyrir að gera nýjan þjónustusamning við Ríkisútvarpið.

„Ég er mjög ánægður með þessa niðurstöðu,“ sagði Illugi Gunnarsson, menntamálaráðherra, í beinni útsendingu í kvöldfréttum Stöðvar 2. Framlag ríkisins til RÚV verður í raun hið sama á næsta ári og á árinu sem er að líða, 3,6 milljarðar.

„175 milljón króna aukaframlagið er til að styrkja RÚV í að kaupa efni frá sjálfstæðum framleiðendum innanlands,“ segir Illugi en þjónustusamningur verður gerður við RÚV um þetta efni. „Fjármunirnir eru þeir sömu en RÚV stendur auðvitað frammi fyrir ákveðnum rekstrarvanda. Ég er allavega ánægður með að það er loksins komin niðurstaða í þetta mál.“