Þungarokkari með 666 vini á Facebook

Sigurður Sverrisson, þungarokkari og almannatengill, hefur í tvö ár verið með 666 vini á Facebook.

„Allir sem eru á Facebook átta sig á því að áður en þú veist af ertu kominn með þúsund „vini“ en átt í raun aðeins samskipti við lítið brot þeirra,“ segir Sigurður aðspurður.

„Ég fór því kerfisbundið að fækka í þessum hópi og veitti því athygli eitt sinn að vinirnir voru nákvæmlega 666 talsins. Mér fannst það skemmtileg tilviljun, meðal annars með skírskotun í lagið Number Of The Beast með Iron Maiden en sú sveit er í miklum metum hjá mér,“ segir hann hress en bætir við að hann haldi lítið upp á kölska sjálfan. „En ég virði rétt fólks til allra trúarbragða án frekara bakgrunnstékks.“

Eftir að vinur Sigurðar á Facebook vakti athygli á vinafjöldanum einsetti hann sér að halda honum í tölunni 666. „Þetta er reyndar ágætis aðhald og heldur vinafjöldanum í skefjum. Þegar einhver sendir mér vinabeiðni met ég hvort ég komi til með eiga einhver samskipti við viðkomandi. Ef ég met það svo samþykki ég beiðnina en fer síðan rakleitt í að finna einhvern sem ég hendi út í staðinn,“ segir hann.

„En ef einhverjum hefur sárnað við að detta úr hópi 666 get ég fullvissað hann um að þetta er engin tilviljun. Treg muðár ðem tlla re atteþ.“