Önnur þáttaröð af Fortitude staðfest

Pivot og Sky Atlantic munu framleiða aðra þáttaröð af Fortitude. Þættirnir voru meðal annars teknir upp á Reyðarfirði. Síðasti þáttur fyrstu þáttarraðarinnar verður sýndur í kvöld.

„Strax frá fyrsta þætti tóku áhorfendur vel í heiminn sem Simon Donald skapaði en þar takast mennirnir og náttúran á með skelfilegum afleiðingum,“ segir Kent Rees hjá Pivot. Þættirnir hafa verið sýndir á sjónvarpsstöðvum um allan heim og eru vinsælustu þættir söluaðilans, Sky Vision, frá upphafi.

Meðal leikara í fyrstu þáttaröðinni má nefna Stanley Tucci, Michael Gambon, Sofie Grabo, Richard Domer og Christopher Eccleson.

Íslendingurinn Ben Frost sá um að semja tónlist fyrir fyrstu þáttaröðina.