Illa hannaður búnaður og óöruggt starfsumhverfi orsök slyssins á Perlu

Illa hannaður búnaður og óöruggt starfsumhverfi voru orsakir slyssins um borð í sanddæluskipinu Perlu í Landeyjahöfn í apríl síðastliðinn þar sem skipverji slasaðist mikið.

Þetta kemur fram í nýrri skýrslu rannsóknarnefndar samgönguslysa.

Í skýrslunni segir að skipverji hafi verið einn að vinna við að spúla lestina og haldið í handfang, fast við hosu, sem losnaði af með þeim afleiðingum að maðurinn kastaðist með henni ofan í lestina.

Skipverjinn lenti meðal annars á járnbita og slasaðist mikið. Í frétt Vísis af slysinu kemur fram að maðurinn hafi tvíbrotnað á læri, brákast á öxl og að minnsta kosti einn hryggjarliður hafi brotnað.

Nefndin segir að hinn slasaði hafi verið að stýra skolstút með tveggja metra handfangi sem soðið var fast á stútendann og staðið á palli milli lestanna. Stúturinn sem losnaði var á gúmmíbarka sem festur var við sjólögnina og handfangið fest í enda hans. „Ekki er vitað af hverju stúturinn losnaði en skipverjinn náði ekki að sleppa handfanginu í tíma.“

Mikill þrýstingur og titringur var á lögninni enda lokað fyrir alla aðra stúta á henni og reglulega hafði þurfi að herða upp á hosuklemmum fyrir gúmmíbarkann.

Lesa má skýrsluna í heild sinni hér.

Sanddæluskipið Perla sökk í Reykjavíkurhöfn í síðasta mánuði.