Vilja Krónu bensínstöðvar í Reykjavík og Kópavogi

Festi, sem rekur matvöruverslun Krónunnar, vill opna bensínstöðvar á lóðum Krónunnar í Reykjavík og Kópavogi. Lagt verður upp úr lágu elsneytisverði á stöðunum og er í bígerð að sækja um leyfi á tveimur öðrum stöðum að sögn Jóns Björnssonar, forstjóra Festi.

Fréttablaðið greindi frá því fyrr í haust að Festi væri að skoða möguleikann á því að opna bensínstöðvar á lóðum Krónunnar. „Við erum með þetta í ferli. Það er umsókn inni í Reykjavík og Kópavogi að fá leyfi til að setja bensíndælur, og í bígerð að sækja um á tveimur öðrum stöðum,“ segir Jón og bætir við að þetta sé langt ferli. Fyrirtækið er einnig búið að vera í viðræðum um kaup á bensíni og dísel í marga mánuði.

Í lok nóvember var beiðni VA Arkitekta fyrir hönd Festis um byggingu bensínstöðvar við Krónuna í Skógarlind 2 í Kópavogi hafnað af skipulagsnefnd bæjarins. Málinu var vísað til afgreiðslu bæjarráðs og bæjarstjórnar og verður afgreitt af bæjarstjórninni á nýju ári. Skipulagsnefnd hafnaði beiðnini þar sem ekki var talið þörf á fleiri bensínafgreiðslum á svæðinu.

Björn Blöndal, formaður borgarráðs Reykjavíkurborgar, segir það stefnu borgarinnar að bensínstöðvum fjölgi ekki og fækki jafnvel. „Flestir held ég fallist á það að fjölgun bensínstöðva bætir ákaflega litlu við gæði borgarumhverfisins. Aðgengi að bensínstöðvum í Reykjavík er yfirdrifin og samkeppni hefur ekki sýnt sig til að breyta miklu um verðmyndun." Hann á því ekki von á að verði tekið vel í þessa beiðni.

„Þetta er spurning um hvort bæjarfélög hafi áhuga á því að það verði breyting á því hvar neytendur kaupi eldsneyti. Það þarf ekki fimm þúsund fermetra lóðir til að selja eldsneyti,“ segir Jón.

Jón segist eins bjartsýnn og hann geti leyft sér að vera um málið. „Við höfum séð að þetta hefur gerst annars staðar. En íslenskur eldsneytismarkaður hefur ekki verið opin fyrir þessu hingað til.“