Vilja að reiðhjólið hljóti friðarverðlaun Nóbels

Reiðhjólið ætti að fá friðarverðlaun Nóbels á næsta ári að mati tveggja ítalskra útvarpsmanna sem hafa hafið undirskriftasöfnun til að þrýsta á að sú verði raunin.

Aðstandendur útvarpsþáttarins Caterpillar, sem nýtur nokkurra vinsælda á Ítalíu, munu skila Nóbelnefndinni undirskriftunum í febrúar en þeir segja reiðhjólið vera „friðartæki.“

Það hafi þannig aldrei orsakað stríð, ólíkt bifreiðum, sem ganga á eftirsóknarverðri olíu. Þá sé reiðhjólið einnig „lýðræðislegasti samgöngumátinn“ að mati þáttarstjórnandanna Massimo Cirri og Sara Zambotti.

Þau bæta við í rökstuðningi sínum að reiðhjólið kosti að sama skapi samfélagið margfalt minna en akstur bíla, bæði hvað varðar slit á vegum og kostnaðinn sem hlýst af þeim fjölmörgu umferðarslysum sem bifreiðar valda á hverju ári.

Takist þeim ítölsku ætlunarverk sitt bætist fararskjótinn í hóp fjölmargra verðlaunahafa en meðal handahafa eru Barack Obama Bandaríkjaforseti, Evrópusambandið, Túniskvartettinn og hinn kínverski Liu Xiaobo.

Nánar á vef BBC.