Fjórðungur nemenda skólans fékk hlaupabólu

Áttatíu börn eða einn af hverjum fjórum nemendum í Brunswick grunnskólanum í Melbourne í Ástralíu hafa fengið hlaupabólu á síðastliðnum tveimur vikum.

Skólinn er sá eini í Viktoríufylki sem hefur beðið foreldra um að virða mismunandi skoðanir þegar kemur að bólusetningum barna. Bólusett börn í skólanum eru 73 prósent samanborið við 90 prósent á fylkisvísu.

Engum skóla í Viktoríufylki er heimilt að neita barni um skólavist ef það er ekki bólusett. Hins vegar eru foreldrar skyldugir að láta skólayfirvöld vita um bólusetningar barna sinna.