Chris Martin tjáir sig í fyrsta skipti um skilnaðinn: „Ég er ánægður að vera á lífi“

Chris Martin, söngvarinn í hljómsveitinni Coldplay, hefur nú í fyrsta sinn tjáð sig um skilnaðinn við fyrrverandi eiginkonu sína Gwyneth Paltrow.

Parið gifti sig árið 2003 og tilkynnti síðan um skilnaðinn árið 2014. Þessi 38 ára Englendingur kom fram í áströlskum útvarpsþætti á dögunum og ræddi um skilnaðinn í fyrsta skipti en hann talaði meðal annars um það að hann væri þakklátur að vera á lífi.

„Ég gekk í gegnum miklar breytingar,“ segir Martin og heldur áfram; „Ég komst að því með tímanum hvar ég fór útaf sporinu. Fyrir nokkrum árum var ég á mjög slæmum stað í lífinu og mjög þungur.“

Martin segir að vinir hans hafi hjálpað honum mikið í gegnum ferlið.

„Þeir kynntu mig fyrir bók sem heitir Man´s Search for Meaning eftir Viktor Frankl og ljóði sem heitir The Guest House eftir afganskt skáld sem heitir Rumi. Þetta kom mér af stað og núna er ég bara ótrúlega ánægður að vera á lífi. Þetta kann að hljóma einfalt en ég er einfaldlega bara ánægður að vera lifandi.“

Eins og áður segir tilkynntu þau Martin og Paltrow um skilnaðinn á síðasta ári.

„Við höfðum verið að vinna lengi í sambandinu, bæði saman og í sitthvoru lagi. Við einfaldlega komumst að þeirri niðurstöðu að meðan okkur þykir vænt um hvort annað þá er betra að við séum í sitthvoru lagi.“

Saman eiga þau tvö börn, þau Apple, 11 ára, og Moses, níu ára. Sjöunda plata Coldplay kemur út í desember og mun hún bera nafnið Head Full Of Dreams.