Haukur Helgi í góðum hópi leikmanna sem komið hafa heim til að hlaða batteríin

Frétt vikunnar, mánaðarins og jafnvel ein af stærstu fréttum körfuboltaársins var að einn allra besti körfuboltamaður landsins, Haukur Helgi Pálsson, ætlar að spila heima í Domino's-deild karla í vetur. Njarðvíkingar voru hlutskarpastir í kapphlaupinu um að fá að njóta þjónustu þessa frábæra körfuboltamanns sem mætir í fyrsta sinn í grænu í kvöld þegar Njarðvík heimsækir KR í DHL-höllina.

Haukur gæti verið að fylgja í fótspor margra af bestu leikmönnum íslenska körfuboltalandsliðsins sem hafa komið heim og eytt hér tímabili þegar þeir áttu að vera upp á sitt besta.

Sjá einnig: Haukur Helgi: Gott að hafa pressu á sér

Hér getum við nefnt leikmenn eins og Helga Má Magnússon, Jón Arnór Stefánsson, Jakob Örn Sigurðarson, Loga Gunnarsson og Pavel Ermolinskij sem allir komu heim í eitt eða eitt og hálft tímabil áður en þeir fóru aftur út. Pavel og Logi entust þó ekki eins lengi og hinir tveir sem eru enn að gera það gott í evrópskum deildum.

Besta dæmisagan um vel heppnað tímabil heima er hjá þeim Jóni Arnóri og Jakobi sem komu báðir heim og spiluðu með KR veturinn 2008-09. Þeir hjálpuðu KR að verða Íslandsmeistari um vorið og komust síðan báðir að erlendis, Jakob í Svíþjóð en Jón Arnór á Spáni.

Verða ekki með í kvöld

Helgi Már Magnússon og Pavel Ermolinskij geta ekki verið með KR í kvöld vegna meiðsla en þeir eru tvö önnur góð dæmi um leikmenn sem hafa komið heim en farið síðan aftur út í atvinnumennsku.

Helgi Már kom heim fyrir tímabilið 2007-08 eftir að hafa spilað í Sviss og bandaríska háskólaboltanum. Hann var heima í tvö tímabil en komst síðan að í Svíþjóð.

Pavel kom heim eftir atvinnumennsku á Spáni og spilaði í eitt og hálft ár með KR. Líkt og Jón Arnór, Jakob og Helgi Már þá fór hann út sem Íslandsmeistari með KR. Helgi Már spilaði í þrjú ár í Svíþjóð og Pavel var þar í tvö ár áður en þeir sneru báðir heim.

Fimmta góða dæmið er síðan Logi Gunnarsson, núverandi liðsfélagi Hauks Helga hjá Njarðvík. Logi kom og spilaði tímabilið 2008-09 með Njarðvík en fór síðan aftur út og lék sem atvinnumaður í fjögur tímabil í Frakklandi og Svíþjóð.

Sjá einnig: Friðrik Ingi: Haukur stórkostlegur

Haukur Helgi er ekki eini leikmaðurinn í Domino's-deildinni sem er kominn heim til að spila eftir ár í atvinnumennsku. Ægir Þór Steinarsson (KR) og Ragnar Nathanaelsson (Þór) voru líkt og Haukur með íslenska landsliðinu á Eurobasket og ættu að öllu eðlilegu að geta komist að erlendis í næstu framtíð.

Hvaða stöðu mun Haukur spila

Það bíða margir spenntir eftir því að sjá hvernig Haukur Helgi Pálsson passar inn í Njarðvíkurliðið og hvaða stöðu þjálfararnir, Friðrik Ingi Rúnarsson og Teitur Örlygsson, ætla að láta hann spila. Haukur er nefnilega það fjölhæfur leikmaður að hann getur nánast spilað allar stöður í deildinni hér heima. Fyrsti leikurinn í kvöld mun svara mörgum spurningum en auðvitað ekki nærri því öllum.

Skemmtilegri körfuboltakvöld

Það er kannski engin draumastaða fyrir íslenska landsliðið að þessir frábæru leikmenn séu ekki að spila í sterkari deild erlendis en á móti kemur að þetta er draumastaða fyrir íslenska körfuboltaáhugamenn sem fá að sjá þessa leikmenn í toppformi að spila í Domino's-deildinni.

Körfuboltakvöldin á Stöð 2 Sport verða örugglega full af tilþrifum frá Hauki, Ægi og Nat-vélinni í allan vetur. Fyrsta sýning er í kvöld þegar Ægir og Haukur mætast í Vesturbænum.

Aðrir leikmenn sem komu heimHelgi Már Magnússon

2007-2009

25-27 ára

Spilaði í tvö tímabil með KR-liðinu og varð Íslandsmeistari seinna árið. Lék síðan í þrjú tímabil í Svíþjóð með Solna Vikings, Uppsala Basket og 08 Stockholm HR áður en hann kom aftur heim.

Jón Arnór Stefánsson

2008-09

27 ára

Spilaði í eitt tímabil með KR-liðinu og varð Íslandsmeistari auk þess að fá bikarsilfur. Hefur síðan leikið í sjö tímabil á Spáni með CB Granada, CAI Zaragoza, Unicaja og Valencia Basket en hann spilar með því síðastnefnda í dag.

Logi Gunnarsson

2008-09

28 ára

Spilaði í eitt tímabil með Njarðvík en náði ekki að fara út sem Íslandsmeistari eins og 2002. Lék síðan í fjögur tímabil í Frakklandi og Svíþjóð með Saint-Étienne, Solna Vikings og Angers.

Jakob Örn Sigurðarson

2008-09

27 ára

Spilaði í eitt tímabil með KR-liðinu og varð Íslandsmeistari auk þess að fá bikarsilfur. Hefur síðan leikið í sjö tímabil í Svíþjóð, fyrstu sex með Sundsvall Dragons og svo með Borås Basket sem hann spilar með í dag.

Pavel Ermolinskij

2010-2011

23-24 ára

Spilaði í eitt og hálft tímabil með KR og fór út sem Íslands- og bikarmeistari sumarið 2011. Lék síðan í tvö tímabil í Svíþjóð með Sundsvall Dragons og Norrköping Dolphins áður en hann kom aftur heim.

Nýir leikmenn sem breyttu miklu fyrir Njarðvík

Danny Shouse 1980-81

Bandaríkjamaðurinn í fyrsta meistaraliði félagsins sem kom til Njarðvíkur frá Ármanni og skoraði 40,0 stig að meðaltali í leik þennan vetur. Lék líka með liðinu árið eftir þegar Njarðvík varð einnig Íslandsmeistari og var þá með 34,3 stig að meðaltali í leik.

Rondey Robinson 1990-91

Hjálpaði liðinu að vinna sinn fyrsta Íslandsmeistaratitil í fjögur ár á sínu fyrsta tímabili af sex. Var með 28,6 stig og 16,8 fráköst að meðaltali á fyrsta tímabili og hjálpaði Njarðvík einnig að vinna titilinn 1994 og 1995.

Valur Ingimundarson 1993-94

Sneri til baka í Ljónagryfjuna eftir fimm tímabil á Króknum en hafði orðið sex sinnum meistari með Njarðvík 1981-87. Valur varð spilandi þjálfari Njarðvíkurliðsins sem fór frá því að enda í 6. sæti og komast ekki í úrslitakeppnina vorið 1993 í það að vinna Íslandsmeistaratitilinn tvö ár í röð.

Teitur Örlygsson 1997-98

Kom aftur heim eftir ár í atvinnumennsku í Grikklandi og Njarðvík varð meistari á endurkomuárinu þrátt fyrir að hafa bara endað í fjórða sæti í deildarkeppninni. Njarðvík toppaði á hárréttum tíma og Teitur átti meðal annars sitt besta stoðsendingatímabil á ferlinum.

Brenton Birmingham 2000-01

Samdi aftur við Njarðvík (var einnig í Njarðvík 1998-99) eftir að Njarðvíkingar misstu af honum til Grindavíkur veturinn á undan. Átti magnað tímabil en var aldrei betri en þegar liðið tryggði sér titilinn á Króknum og Brenton var með fjórfalda tvennu (28 stig, 11 stoðsendingar, 10 fráköst og 10 stolna bolta). Varð síðan einnig Íslandsmeistari með Njarðvík 2002 og 2006.

Jeb Ivey 2005-06

Kom til Njarðvíkur eftir að spilað í tvö ár á Íslandi, fyrst með KFÍ (2003-04) og svo með Fjölni (2004-05). Hjálpaði Njarðvík að vinna sinn fyrsta Íslandsmeistaratitil í fjögur ár. Var með 24,2 stig og 5,9 stoðsendingar að meðtali í leik í deildinni og skoraði 30 stig þegar Njarðvík tryggði sér titilinn í Borgarnesi. Fór með Njarðvík í lokaúrslitin árið eftir.

Stefan Bonneau 2014-15

Leysti Dustin Salisbery af á miðju tímabili og sló í gegn. Bonneau var einn tilþrifapakki frá fyrsta leik og var með 36,9 stig og 5,1 stoðsendingu að meðaltali í leik. Njarðvík var næstum því búið að slá verðandi Íslandsmeistara KR út í mögnuðum tvíframlengdum oddaleik í undanúrslitunum þar sem Bonneau skoraði 52 stig.