Dularfullar dúkkur Halla Þórlaug Óskarsdóttir skrifar 2. nóvember 2015 09:30 Dúkka Höfundur: Gerður Kristný Myndskreyting: Linda Ólafsdóttir Mál og menning Prentun: Oddi 97 bls. Gerður Kristný hefur sent frá sér hrollvekjuna Dúkka, fyrir börn frá átta ára aldri. Hún er fljótlesin, enda bæði stutt og spennandi. Sagan segir frá hinni tíu ára Kristínu Kötlu sem eyðir afmælispeningum sínum í dúkku af ákveðinni gerð sem allar stelpur eru með æði fyrir. Þessar dúkkur ganga fyrir sérstökum rafhlöðum og þeir sem kaupa dúkku geta skráð sig á heimasíðu fyrirtækisins og fengið orðsendingar sendar reglulega í pósti. Vinkona Kristínar Kötlu, hún Sólveig, fékk svoleiðis dúkku fyrir ári síðan, langt á undan öllum hinum stelpunum – en nú, í kringum hrekkjavöku, er eins og eitthvað dularfullt sé að koma í ljós. Sólveig er afar utan við sig og Kristín Katla og tvíburabróðir hennar, Pétur Uni, fyllast áhyggjum. Sjálf fyllist Kristín Katla auk þess ólýsanlegri væntumþykju til dúkkunnar sinnar. Samfara þessum hörmungum syrgja systkinin einnig föður sinn, sem lést nokkrum mánuðum fyrr. Ferlið hefur verið erfitt og mamma er alls ekki sjálfri sér lík. Höfundur segir fallega frá því hvernig fjölskyldan finnur smám saman taktinn aftur og hjálpast að í sorginni. Myndlýsingar Lindu Ólafsdóttur eru frábærar, hið eina sem út á þær má setja er að myndirnar hefðu mátt vera fleiri. Hún leggur natni í smáatriðin og myndbygging fer vel á síðunum. Bókin er virkilega falleg og það er hægt að verja góðum stundum í að dást að henni. Eflaust má lesa í söguna boðskap og vangaveltur um fyrirmyndir ungra stúlkna, hjarðhegðun, mikilvægi þess að gleyma ekki sjálfum sér og leggja rækt við það sem manni er kærast ... en eins og almennilegum barnabókum er lagið er hann ágætlega falinn. Dúkka er fyrst og fremst æsispennandi saga fyrir unga krakka, höfundur dreifir vísbendingum jafnt yfir kaflana svo lesandinn sökkvir sér í söguþráðinn. Málfar og orðaval er einfalt, þótt einstaka langlokur læðist inn á milli, og letur auðlæsilegt svo ungir lesendur ættu að geta tekið bókina upp í rúm með sér á kvöldin – þótt það sé kannski ekki ráðlegt nú þegar myrkva tekur fyrir háttatíma!Niðurstaða: Hrollvekjandi bók fyrir yngstu spennufíklana, sem líka fjallar um vináttuna, falleg fjölskyldubönd og það að læra að lifa með sorginni. Bókmenntir Menning Mest lesið „Ég trúði því aldrei að ég yrði þessi gaur“ Lífið Sonur Rögnu og Árna kominn með nafn Lífið Frumsýning á Vísi: Eldgos, hamfarir og ást í kitlu fyrir Eldana Bíó og sjónvarp Stjörnulífið: Maraþon, brúðkaup og gellugallinn Lífið Skúli hannaði hof fyrir Grímu Lífið Fagurkeri selur miðbæjarperlu Lífið Þetta eru keppendur Ungfrú Ísland Teen 2025 Lífið Kom með blóðugar tær í mark eftir heilt maraþon berfættur Lífið Hegðun Benedikts kom upp um bónorðið Lífið „Hjálpar okkur í að nýta þjónustu sem er ekki til á Íslandi í dag en ætti að vera til“ Lífið Fleiri fréttir Kynferðisleg gremja, sænskur senuþjófur og náttúruklám Ræðst framtíð grínmyndarinnar hér? Aumkunarverð endurvinnsla og ferskt framhald Áferðarfallegir en óeftirminnilegir fjórmenningar Vók Ofurmenni slaufað Gamli er (ekki) alveg með'etta Mömmustrákur skýtur uppvakningum ref fyrir rass Norah Jones: Tíminn stóð í stað þar til ljóskastarinn vakti mann Sjá meira
Dúkka Höfundur: Gerður Kristný Myndskreyting: Linda Ólafsdóttir Mál og menning Prentun: Oddi 97 bls. Gerður Kristný hefur sent frá sér hrollvekjuna Dúkka, fyrir börn frá átta ára aldri. Hún er fljótlesin, enda bæði stutt og spennandi. Sagan segir frá hinni tíu ára Kristínu Kötlu sem eyðir afmælispeningum sínum í dúkku af ákveðinni gerð sem allar stelpur eru með æði fyrir. Þessar dúkkur ganga fyrir sérstökum rafhlöðum og þeir sem kaupa dúkku geta skráð sig á heimasíðu fyrirtækisins og fengið orðsendingar sendar reglulega í pósti. Vinkona Kristínar Kötlu, hún Sólveig, fékk svoleiðis dúkku fyrir ári síðan, langt á undan öllum hinum stelpunum – en nú, í kringum hrekkjavöku, er eins og eitthvað dularfullt sé að koma í ljós. Sólveig er afar utan við sig og Kristín Katla og tvíburabróðir hennar, Pétur Uni, fyllast áhyggjum. Sjálf fyllist Kristín Katla auk þess ólýsanlegri væntumþykju til dúkkunnar sinnar. Samfara þessum hörmungum syrgja systkinin einnig föður sinn, sem lést nokkrum mánuðum fyrr. Ferlið hefur verið erfitt og mamma er alls ekki sjálfri sér lík. Höfundur segir fallega frá því hvernig fjölskyldan finnur smám saman taktinn aftur og hjálpast að í sorginni. Myndlýsingar Lindu Ólafsdóttur eru frábærar, hið eina sem út á þær má setja er að myndirnar hefðu mátt vera fleiri. Hún leggur natni í smáatriðin og myndbygging fer vel á síðunum. Bókin er virkilega falleg og það er hægt að verja góðum stundum í að dást að henni. Eflaust má lesa í söguna boðskap og vangaveltur um fyrirmyndir ungra stúlkna, hjarðhegðun, mikilvægi þess að gleyma ekki sjálfum sér og leggja rækt við það sem manni er kærast ... en eins og almennilegum barnabókum er lagið er hann ágætlega falinn. Dúkka er fyrst og fremst æsispennandi saga fyrir unga krakka, höfundur dreifir vísbendingum jafnt yfir kaflana svo lesandinn sökkvir sér í söguþráðinn. Málfar og orðaval er einfalt, þótt einstaka langlokur læðist inn á milli, og letur auðlæsilegt svo ungir lesendur ættu að geta tekið bókina upp í rúm með sér á kvöldin – þótt það sé kannski ekki ráðlegt nú þegar myrkva tekur fyrir háttatíma!Niðurstaða: Hrollvekjandi bók fyrir yngstu spennufíklana, sem líka fjallar um vináttuna, falleg fjölskyldubönd og það að læra að lifa með sorginni.
Bókmenntir Menning Mest lesið „Ég trúði því aldrei að ég yrði þessi gaur“ Lífið Sonur Rögnu og Árna kominn með nafn Lífið Frumsýning á Vísi: Eldgos, hamfarir og ást í kitlu fyrir Eldana Bíó og sjónvarp Stjörnulífið: Maraþon, brúðkaup og gellugallinn Lífið Skúli hannaði hof fyrir Grímu Lífið Fagurkeri selur miðbæjarperlu Lífið Þetta eru keppendur Ungfrú Ísland Teen 2025 Lífið Kom með blóðugar tær í mark eftir heilt maraþon berfættur Lífið Hegðun Benedikts kom upp um bónorðið Lífið „Hjálpar okkur í að nýta þjónustu sem er ekki til á Íslandi í dag en ætti að vera til“ Lífið Fleiri fréttir Kynferðisleg gremja, sænskur senuþjófur og náttúruklám Ræðst framtíð grínmyndarinnar hér? Aumkunarverð endurvinnsla og ferskt framhald Áferðarfallegir en óeftirminnilegir fjórmenningar Vók Ofurmenni slaufað Gamli er (ekki) alveg með'etta Mömmustrákur skýtur uppvakningum ref fyrir rass Norah Jones: Tíminn stóð í stað þar til ljóskastarinn vakti mann Sjá meira