Magnús Ver fær 600 þúsund krónur í bætur vegna hlerana

Magnúsi Ver Magnússyni, fyrrverandi sterkasta manns heims, hafa verið dæmdar 600 þúsund krónur í bætur frá ríkinu vegna ólögmætar meingerðar í hans garð. Héraðsdómur Reykjavíkur kvað upp þennan dóm rétt í þessu. Málskostnaður fellur niður.

Magnús Ver fór fram á tíu milljónir króna í miskabætur frá ríkinu auk dráttarvaxta og málskostnaðar. Ríkið fór hins vegar fram á verulega lækkaðar dómkröfur og að málskostnaður verði felldur niður, en krafðist ekki sýknu.

Magnús sagði í samtali við Vísi eftir að dómur var uppkveðinn að dómurinn væri að hluta til vonbrigði fyrir sig. Hann teldi hann léttvægan því hann hafði vonast til þess að hann myndi hafa fordæmisgildi.

Sjá einnig: Magnús Ver um símhleranir: Mér varð verulega brugðið

Upphaf málsins má rekja til símtals sem Magnús Ver fékk frá lögreglunni þann 21. ágúst í fyrra. Í því símtali tilkynnti lögreglumaður Magnúsi Ver að lögreglan hefði beitt ýmsum rannsóknarúrræðum í rannsókn sem beindist að honum á sínum tíma, þar með talið að hlera síma hans, nota eftirfararbúnað í bifreið hans sem og að setja hlustunarbúnað í bifreið í umráðum Magnúsar.

Sjá einnig: Magnús Ver vill 10 milljónir í bætur frá íslenska ríkinu

Magnús byggði bótakröfu sína á því að hafa verið rannsakaður af lögreglu í nærri þrjú ár en 1. október árið 2014 var lögmanni Magnúsar tilkynnt um að rannsókn málsins, þar sem Magnús hafði réttarstöðu grunaðs manns, væri lokið. Var Magnús grunaður um stórfellt fíkniefnasmygl en sá grunur reyndist ekki á rökum reistur og var rannsókn málsins hætt.