Makríll fyrir Úkraínumenn skapar vinnuna á Þingeyri

Blússandi gangur er nú í makrílfrystingu á Þingeyri, unnið tólf tíma á dag og einnig um helgar, - allt fyrir Úkraínumarkað. Innflutningsbann Rússa truflar því ekki fiskvinnslu í Dýrafirði, eins og stefnir í víða annars staðar á landinu.

„Það er vertíð. Mikil vinna, sjö til sjö, laugardaga og sunnudaga. Það er brjálað að gera,“ segir Sigríður Kristín Ólafsdóttir, rekstrarstjóri Íslensks sjávarfangs á Þingeyri, í viðtali í fréttum Stöðvar 2.

Þarna vinna þrjátíu manns, baki brotnu, þessa dagana við að frysta makríl. Hún vonast til að lokun Rússlandsmarkaðar trufli ekki starfsemina, því þessi makríll er á leið annað; til Úkraínu.

Makrílvinnslan er raunar bara tímabundin, þrjá mánuði yfir sumarið. Níu mánuði ársins eiga þorskur, ýsa, ufsi og aðrar bolfisktegundir að skapa störfin.

Það blés ekki byrlega fyrir byggðinni á Þingeyri þegar Vísir hf. ákvað að hætta fiskvinnslu þar fyrir ári. Það hefur hins vegar heldur betur ræst úr. Fyrirtækið Íslenskt sjávarfang keypti eignirnar, endurvakti reksturinn í vor og fjölgaði starfsmönnum um helming. 

„Við vorum heppin, vona ég, að Íslenskt sjávarfang kom með starfsemi sína hér á Þingeyri. Þannig að við erum bara bjartsýn,“ segir Sigríður og spyr hvort Þingeyri yrði annars sumarbústaðabyggð. 

Athygli vekur hátt hlutfall Íslendinga en um helmingur starfsmanna eru íslenskir. 

„Það stefna nú voða margir í borgina, af okkar unga fólki. En okkar sérstaða er að það eru Íslendingar ennþá á Þingeyri,“ segir Sigríður Kristín.