Hjón nefndu veikan son sinn í höfuðið á Gunnari Nelson

Bandarísku hjónin Stephanie Ann og Bradley Kenealy skírðu son sinn Gunnar í höfuðið á Gunnari Nelson. Þetta skrifar Stephanie á Facebook síðu Gunnars.

„Eftir nokkra mánuði af nafnaleit ákvað ég, eftir að hafa horft á nokkra bardaga með eiginmanni mínum, að Gunnar væri hið eina rétta. Enginn vafi, það var sterkt og áhrifamikið,“ skrifar Stephanie.

Sonur hennar, Gunnar James Kenealy, fæddist 25. júlí síðastliðinn en hann hefur verið veikur frá fæðingu. „Hann er bardagamaður en hann hefur enga hugmynd um það ennþá, hann hefur ekki enn fengið að fara heim af spítalanum.“ Læknar vita ekki hvað amar að Gunnari litla.

„Það er í eðli okkar að berjast og Gunnar er nafn bardagamanns. Hann mun berjast.“

What a beautiful boy. I'm honoured to bare the same name as he. Keep fighting buddy. My thoughts are with you and your family.

Posted by Gunnar Nelson on Wednesday, August 5, 2015

Gunnar Nelson hefur svarað Stephanie á síðu sinni undir myndinni. Þar segir hann: „En fallegur drengur. Það er mikill heiður að bera sama nafn og hann. Haltu áfram að berjast félagi. Hugur minn er hjá þér og fjölskyldu þinni.“

Stephanie á annan strák sem hefur verið veikur líka. Hann fór í þrjár aðgerðir á heila þegar hann var lítill. „Og vann hvern bardaga á undir 45 sekúndum.“

Maður Stephanie er mikill áhugamaður um bardagaíþróttir en hefur þjálfað, keppt, dæmt og verið lærifaðir ungra krakka sem eru að stíga sín fyrstu skref í heim bardagaíþróttanna.  

Undir mynd Stephanie hafa fleiri deilt myndum af ungum drengjum sem bera nafnið Gunnar.

Gunnar Nelson deildi færslu Stephanie á síðu sinni en hana má sjá hér að neðan.