Drullaðu þér vestur: Svona tæklar þú Mýrarboltann

Mýrarboltamótið verður haldið í tíunda skipti um Verslunarmannahelgina og fer það að vanda fram í Tunguskógi í Skutulsfirði.

Mótið hefst á föstudagskvöldinu og síðan verður bara spilaður drullubolti næstu daga. Mýrarboltinn er ein stærsta útihátíðin á Íslandi og er hátíðin orðin gríðarlega vinsæl. Lífið hefur fengið til liðs við sig þrjá sérstaka sérfræðinga um Mýrarboltamótið og hvernig hægt er að hámarka gleðina fyrir þá sem ætla að drulla sér vestur.

María Rut Kristinsdóttir, markaðsstjóri GOmobile: „Mikilvægast að taka með sér nóg af auka fötum, teppi en mestu máli skiptir að vera í peppuðu og vel skipulögðu liði. Og TEIP til að teipa skóna fasta svo þeir detti ekki af í drullunni. Ekki missa af stemningunni á mótssvæðinu yfir daginn, þó maður sé kaldur og blautur þá er skemmtilegast að vera með bara góðan stað þar sem liðið kemur saman og nóg af teppum.

Ef maður er í skemmtilegu liði þá skapar maður óendanlega margar góðar minningar, það að keppa er drulluerfitt en algjörlega þess virði, svo eru líka alls konar ekta sveitaböll og þannig sem skemmtilegt er að upplifa. Búningarnir eru mikilvægir og það er náttúrulega langbest að vera búin að pæla mikið í þeim. Mitt lið hefur alltaf verið alveg glatað í Mýrarbolta en í glæsilegum búningum. Maður verðir að velja og hafna. En besta dressið er náttúrulega eitthvað Vatnshelt sem að hrindir drullunni frá og auðvelt er að skola.“

Orri Freyr Rúnarsson, útvarpsmaður á X-977: „Það sem gerir hátíðina sérstaka er fyrst og fremst staðsetningin, fátt sem toppar að kyngja síðasta sopanum af volgu vatni með Treo í þann mund sem maður mætir á Mýrarboltasvæðið.

Það er líka eitthvað svo óraunverulegt að standa fyrir framan drullupytt á sunnudagsmorgni á meðan að jólasveinar, skátar, górillur og aðrar furðuverur arka um svæðið drullugar upp fyrir haus.

Á Mýrarboltanum gildir ekkert bull um að taka góða skapið með sér, mikilvægast er að mæta með keppnisskapið. Svo er ekki verra að taka eitthvað af hlýjum fötum til að skutla yfir sig strax eftir leiki í drullunni, þó svo að Ísafjörður sé oft kallaður Ibizafjörður getur orðið ansi kalt ef maður er vel blautur og drullugur upp fyrir haus. Ef þú ætlar að gista á tjaldsvæðinu er svo sterkur leikur að taka tjaldbúnað með sér. 

Myndi tala við heimamenn og komast að því hvenær liðið „Píkubanar“ mæta á svæðið, innkoma þeirra hefur verið á heimsmælikvarða og eitthvað sem enginn ætti að missa af. Hið fullkomna Mýrarbolta dress er frumlegt, óþægilegt, fyrirferðarmikið og eitthvað sem hentar afar illa í bleytu og drullu

Brynja Huld Óskarsdóttir, Ísfirðingur: „Mikilvægast að taka með sér á mýrarboltann er án nokkurs vafa getnaðarvarnir, því ég hugsa að fæstir séu til í hinar alræmdu afleiðingar verslunarmannahelgar, svokölluðum síð-apríl-byrjun-maí-börnum. Annað mikilvægt væri að taka með sér teppi til að hlýja sér á milli leikja svo ekki þurfi að grípa til þess ráðs að stela gardínum úr stofunni hjá mömmu sinni til að nota sem teppi (en að sjálfsögðu verður besta veðrið á Ísafirði). 

Alls ekki má missa af innkomu Píkubananna á laugardagsmorgun, þeir gera í því að toppa sjálfa sig í innkomu ár eftir ár og má búast við því að þeir gangi fram af sjálfum sér og öðrum í ár. Það sem gerir þessa hátíð sérstaka er náttúrulega það að hún er haldin í besta bæ á Íslandi.

Hið fullkomna dress á mýrarboltann væri að sjálfsögðu að vera í einhverju ferlega smart búningi og svo djammhæf á kvöldin. Plís elsku 101-hipsterar, það er malbik á Ísafirði, sturtur, sundlaugar og skemmtistaðir, svo að staðalfjallgöngubúnaður er óþarfur þó svo þið séuð komin út á land. Ein ást samt.“