Vel heppnaðir tónleikar: Ásgeir bjóst við tíu gestum á Esjuna

Tónlistarmaðurinn Ásgeir Trausti spilaði á Esjunni í kvöld fyrir um nokkur hundruð gesti. „Það er gaman að sjá svona marga. Við bjuggumst við svona  tíu,“ sagði Ásgeir við tónleikagesti.

Hægt var að taka þyrluflug upp á topp fjallsins fyrir þá sem ekki vildu ganga en tónleikarnir voru í boði þyrluþjónustunnar Helo og Nova.

Kalt var í veðri en þrátt fyrir það voru einstaka menn á stuttbuxum enda komið sumar á Íslandi þrátt fyrir að hitastigið nái ekki upp í tveggja stafa tölu.

Tólf þyrluferðir þurfti til að koma öllum tónleikagræjunum upp á fjallið en það virðist hafa verið vel þess virði því að fólk var í góðum gír og raulaði með Ásgeiri.

„Það er búið að vera mjög gaman að vera með ykkur,“ sagði Ásgeir Trausti rétt áður en hann spilaði lokalag sitt Nýfallið regn. „Og kalt,“ bætti hann síðan við.

Ásgeir spilar næst í Hörpunni þann 16. júní.