Vandi innanlandsflugsins: Farþegum fækkað um fjórðung þrátt fyrir fjölgun ferðamanna

Þrátt fyrir að tvöfalt fleiri erlendir ferðamenn hafi heimsótt Ísland í fyrra miðað við árið 2008 hefur farþegum í innlandsflugi fækkað um um fjórðung.

Árni Gunnarsson, forstjóri Flugfélags Íslands, segir  erlenda farþega ekki nema tæplega tíu prósent af heildarferþegafjölda Flugfélagins. Þó hafi hlutfall þeirra hækkað á síðustu árum. „Fyrir fimm til sex árum var þetta ekki nema svona fimm prósent. Þannig að fjöldi erlendra farþega hefur verið að vaxa.“

Árni segir þó að uppistaðan í markaði Flugfélags Íslands séu Íslendingar en ekki erlendir ferðamenn.

„Innanlandsmarkaðurinn á Íslandi er mjög tengdur ástandinu efnahagslífinu. Það hefur kannski ekki verið mikill uppgangur þar,“ segir Árni. Þróunin í fjölda flugfarþega hafi því að mestu verið í samræmi við umsvif í efnahagslífinu.

„Fyrst eftir hrunið, 2009 og 2010, fækkaði farþegum mjög skarpt. Svo kom smáaukning 2011 og 2012 og en svo hélt áfram að fækka farþegum.“

Ferðamenn virðast fremur kjósa bílinn

Árni segir að miðað við uppgang bílaleiga hér á landi virðist vera sem flestir ferðamenn kjósi fremur keyra um Ísland. „Ef maður kemur á eyju, t.d. til Kanaríeyja eða eitthvað svoleiðis, þá er kannski ekki það fyrsta sem manni dettur í hug að fljúga á næstu eyju,“ segir Árni og bendir á að frá flestum stöðum í Evrópu sé þriggja til fjögurra tíma flug til Íslands og enn lengra frá Bandaríkjunum.

„Þá þarf að hafa svolítið fyrir því að sannfæra menn um að það sé gáfulegt að fara í annað flug þegar það er svona tiltölulega einfalt að keyra um landið á flestum tímum ársins.“

Gengið hægt að fjölga ferðum beint frá Keflavíkurflugvelli

Árni segir að Flugfélag Íslands hafi, í samstarfi við Icelandair, unnið að því reyna að byggja upp innanlandsflug í gegnum Keflavíkurflugvöll í. Í sumar, líkt og síðustu ár, verði flogið þrisvar til fjórum sinnum í viku beint frá Keflavíkurflugvelli út á land. „Viðbrögðin hafa reyndar verið þannig að ekki hefur verið ástæða til að bæta við mikið af flugum. Icelandair selur þetta í öllum sínum sölukerfum.“