Forsetinn lýsir velþóknun á raforkusölu um sæstreng

Tímabært er að Íslendingar stofni sérstakan orkuauðlindasjóð um arðinn af Landsvirkjun og af öðrum orkuauðlindum. Þetta sagði Bjarni Benediktsson, fjármála- og efnahagsráðherra, á ársfundi Landsvirkjunar í dag. Þá vakti athygli að Ólafur Ragnar Grímsson, forseti Íslands, lýsti velþóknun á sæstrengjum.

Ársfundurinn markaðist af því að þetta er fimmtugasta afmælisár Landsvirkjunar og mátti sjá helstu áhrifamenn á sviði orkumála þjóðarinnar undanfarna áratugi mætta í Hörpu, þeirra á meðal Jóhannes Nordal, stjórnarformann fyrirtækisins fyrstu þrjátíu árin, en salurinn heiðraði hann sérstaklega með lófataki.

Í ávarpi forseta Íslands komu fram skilaboð þegar hann lýsti því hvernig raforkusala um sæstrengi hefði aukið þjóðarauð Norðmanna. Sæstrengirnir hefðu líka reynst nauðsynleg styrking á orkuöryggi Noregs og trygging um aðgang að orku frá öðrum löndum við áföll á heimaslóð eða hamfarir í náttúrunni.

Forsetinn sagði raunar ný þáttaskil blasa við Landsvirkjun með vexti gagnavera, óskum um fleiri iðjuver og með sæstreng. Framundan gæti verið nýtt og glæsilegt vaxtarskeið þjóðinni til heilla „..ef við berum gæfu til að vanda verkin og varðveita samstöðuna,“ sagði Ólafur Ragnar.

Ræðumönnum á ársfundinum varð tíðrætt um mikinn hagnað Landsvirkjunar, sem nam í fyrra 19 milljörðum króna, fyrir óinnleysta fjármagnsliði. Það er álíka mikið og kostaði að byggja Hörpu. Fjármálaráðherra var þó á því að arðinn af virkjunum landsmanna ætti að nýta með öðrum hætti en að reisa slíka glæsihöll á hverju ári.

„Ég tel tímabært að við Íslendingar stofnum sérstakan orkuauðlindasjóð, fullveldissjóð okkar Íslendinga sem í myndi renna allur beinn arður af nýtingu orkuauðlindanna. Með því að leggja inn í sérstakan sjóð arðgreiðslur Landsvirkjunar og annarra orkufyrirtækja ríkisins getum við hafið uppbyggingu á varasjóði okkar Íslendinga, sem um leið væri hugsaður sem stöðugleikasjóður til að jafna út sveiflur í efnahagslífinu.“

Bjarni kvaðst vilja leita eftir samstöðu um slíkan sjóð, nú væri rétti tíminn til að taka slíka ákvörðun.

„Til að byrja með kæmi til greina að orkuauðlindasjóðurinn væri gegnumstreymissjóður, nýttur til að greiða niður skuldir ríkisins og styðja við fjármögnun mikilvægra innviða á borð við framkvæmdir Landspítalans eða uppbyggingu í menntakerfinu,“ sagði Bjarni.