Hörður Axel með 22 stig í sigri Mitteldeutscher

Hörður Axel Vilhjálmsson og félagar í Mitteldeutscher BC unnu góðan fimm stiga sigur, 91-86, á BG Göttingen í þýsku úrvalsdeildinni í körfubolta í dag.

Göttingen leiddi með sjö stigum í hálfleik, 49-42. Mitteldeutscher minnkaði muninn í fimm stig fyrir lokaleikhlutann sem Hörður og félagar unnu svo með 10 stigum.

Lokatölur 91-86, Mitteldeutscher í vil en liðið er í 12. sæti deildarinnar.

Hörður átti flottan leik í liði Mitteldeutscher, skoraði 22 stig, tók þrjú fráköst og gaf þrjár stoðsendingar. Hann setti niður fimm þriggja stiga körfur í átta tilraunum.