Ætlar ekki að kæra Jeremy Clarkson

Oisin Tymon starfsmaður við Top Gear þættina, hefur ákveðið að kæra Jeremy Clarkson ekki fyrir líkamsárás. Clarkson sló Tymon á hóteli í byrjun mars útaf því að Clarkson fékk ekki heitan mat. Vör Tymon sprakk og hann fékk bólgur í andliti.

Vegna höggsins ákvað BBC að endurnýja ekki samning sinn við Clarkson og er framtíð Top Gear því í lausu lofti.

Um ein milljón manna skrifuðu undir undirskriftarlista um að Clarkson yrði endurráðinn og hefur hann notið gífurlegs stuðnings á samfélagsmiðlum.

Tymon hefur hins vegar orðið fyrir miklum árásum á samfélagsmiðlum og hefur honum jafnvel verið hótað dauða. Jeremy Clarkson sagði blaðamönnum að fólk ætti að hætta að kenna Tymon um, hann hefði ekkert gert af sér.