Stefnt að lagningu sæstrengs næsta sumar

Stefnt er að því að hefja lagningu sæstrengs milli New York og London með viðkomu á Írlandi næsta sumar. Lagning strengsins yfir Atlantshafið er forsenda þess að hægt sé að fjármagna legg út frá sæstrengnum til Íslands að sögn Gísla Hjálmtýssonar, framkvæmdastjóra Thule Investments.

Gísli segir að nú sé verið er að leggja lokahönd á fjármögnun sæstrengsins milli Ameríku og Evrópu. „Ég er bjartsýnn á að það takist en við eigum von á því að það skýrist fljótlega,“ segir Gísli. Gangi það eftir og er búist við að sæstrengurinn verði tekinn í notkun næsta haust.

Fjármögnun það eina sem hindrar lagningu strengsins

Í Morgunblaðinu í gær var greint frá því að nýir aðilar hefðu tekið við lagningu sæstrengsins af fyrirtækinu Emerald Networks sem ætlaði að leggja sæstrenginn. Gísli segir ekki aðalatriði hver sjái um lagningu sæstrengsins heldur að hann verði lagður. Þá segir hann lagningu sæstrengsins milli London og New York alltaf hafa verið forsendu fyrir Íslandsleggnum. Fyrst þurfi að tryggja að sæstrengurinn milli Evrópu og Ameríku verði lagður, fyrr sé erfitt að fá fjárfesta til að skuldbinda sig vegna Íslandsleggsins að sögn Gísla.

Gísli segir fjármögnun í raun það eina sem hindri að verkefnið komist af stað, búið sé að ljúka bæði tækni og hönnunarvinnu. Náist að ljúka fjármögnun ætti að vera hægt að leggja strenginn til Íslands á fremur skömmum tíma.

Segir Ísland illa tengt við umheiminn

Hann segir að sæstrengurinn myndi skipta miklu fyrir tengingar Íslands við umheiminn. Í alþjóðlegu skýrslunni Data Center Risk Index endaði Ísland í 29. sæti af 30. þjóðum í gæðum nettenginga til og frá landinu.

Gísli telur að Ísland standi að mörgu leyti ágætlega fyrir gagnver. Rafmagn sé til staðar og viðskiptaumhverfið sæmilegt þrátt fyrir að orðspor landsins hefði beðið hnekki í bankahruninu og gjaldeyrishöftin flæki vissulega stöðuna. Íslendingar þurfi að leggja hart að sér til þess að fá gagnver til landsins enda samkeppnin mikil.

Sæstrengur stærsta innviðamálið

Hann segir fjárfestinguna, sex milljarði, vissulega vera háa upphæð en í samhengi við aðra grunn innviði á borð við jarðgöng sé þetta ekkert sérstaklega mikið. „Þetta er stærsta innviðamálið hjá okkur. Að fá fleiri strengi til að tryggja áreiðanleika og fá beina tengingu til Bandaríkjanna. Þetta er lykilatriði til að fá gagnaiðnað sem selur ekki bara rafmagn til gagnveranna,“ segir Gísli.