Björgvin Páll: Ég vil heyra allt það sem er sagt um okkur

Björgvin Páll Gústavsson, markvörður íslenska landsliðsins, segir að það hafi verið dræm stemning í landsliðshópnum eftir tapið gegn Tékklandi í gær.

Ísland mætir á morgun Egyptalandi í lokaumferð riðlakeppninnar. Þá mun ráðast hvort að strákarnir okkar komast áfram en allra helst þurfa þeir á sigri að halda í leiknum.

„Stemningin var þung í gærkvöldi - eins og hún átti að vera. Nóttin var í samræmi við það,“ sagði Björgvin Páll en viðtalið má heyra í heild sinni hér fyrir ofan.

„Það var lítið sofið en menn hafa fengið nú smá tíma til að hugsa sinn gang. Fram að fundi notum við tímann til að koma sér í stand, bæði líkamlega og andlega, og þá byrjum við að ræða taktík fyrir næsta leik.“

Björgvin Páll segist ekki hafa dvalið lengi við leikinn gegn Tékklandi. „Ég fór beint í að skoða næsta andstæðing og spá aðeins í Egyptunum. Það sem við þurfum helst að athuga varðandi leikinn í gær er andlegi þátturinn og hver og einn þarf að taka hann fyrir hjá sér.“

„Ég þarf að laga sjálfur það sem fór úrskeðis hjá mér. En við getum ekki hengt okkur í því að velta því fyrir okkur hvort að Jicha hafi skorað einu marki of mikið eða þess háttar. Það skiptir litlu máli gegn Egyptum.“

Hann segir að það sé ekki til of mikils mælst að leikmenn nái að núllstilla sig á þeim skamma tíma sem er til stefnu fyrir leikinn gegn Egyptalandi á morgun.

„Það er krafa sem við setjum á sjálfa okkur. Það verður verðugt verkefni að mæta Egyptum sem eru með allt með sér en við með allt á móti okkur. Það er í þeim aðstæðum sem það reynir mest á okkur og við þurfum að sýna úr hverju við erum gerðir.“

Það hefur verið mögnuð stemning á leikjum Egyptalands til þessa á mótinu og strákarnir fengu smjörþefinn af henni frá leik liðsins gegn Svíum sem var á undan leik Íslands og Tékkland í Al Sadd höllinni í gær.

„Við heyrðum í henni alla leið inn í klefa en það mun bara hjálpa okkur. Við þurfum á því að halda að það sé ýtt við okkur og mótlætið mun bara styrkja okkur.“

„Mótlætið er mikið að heiman, bæði með umræðunni og allt annað sem fylgir umfjölluninni um okkur. Við fáum svo fulla höll á móti okkur og ef það fær okkur ekki til að standa saman þá gerir það ekkert.“

Björgvin Páll segist alltaf skoða samfélagsmiðlana eftir leiki íslenska landsliðsins og gærkvöldið var engin undantekning. „Það angrar mig meira ef ég veit ekkert hvað er að gerast heima og þá finnst mér allt eins betra að lesa gagnrýnina og hvað sérfræðingarnir hafa að segja. Mér finnst gaman að því og öll gagnrýni á rétt á sér, sérstaklega þegar við spilum svona.“

„Við þurfum að nota það sem orku og sem betur fer kemur margt jákvætt á móti að heiman í mínu tilfelli sem gleður mig og kætir.“