Forsætisráðherra segist telja að Alþingi beri skylda til að rannsaka málið

Víglundur Þorsteinsson lögfræðingur og fyrrum forstjóri BM Vallár, sakar Steingrím J. Sigfússon og fyrri ríkisstjórn, um „stófelld brot“ þegar bönkunum var skipt upp eftir hrun og fullyrðir að erlendir hrægammasjóðir hafi þannig hagnast um 300 til 400 milljarða króna.

Steingrímur J. Sigfússon fyrrverandi fjármálaráðherra segir ásakanir Víglundar um stórfelld lögbrot, fáheyrðar og fráleitar.

Víglundur sendi gögn, meðal annars stofnúrskurði FME máli sínu stuðnings á Einar K. Guðfinnsson forseta Alþingis og alla þingmenn í gærkvöldi og hvatti Alþingi til að rannsaka málið.

Staðfestir það sem bent var á

Sigmundur Davíð Gunnlaugsson forsætisráðherra segir að þessi nýju gögn staðfesti það sem hann og fleiri hafi lengi haldið fram. Hann telur að Alþingi beri skylda til að rannsaka málið.

„Þarna kemur í ljós það sem ég og fleiri í mínum flokki höfum bent á frá ársbyrjun 2009, að þarna hafi verið til staðar stórkostlegt tækifæri til að snúa dæminu við, almenningi í hag, og ekki hvað síst, heimila með skuldir,“ segir forsætisráðherra. „Tækifærið var ekki nýtt og það sem við sjáum núna í þessum nýju gögnum, að menn létu ekki aðeins hjá líða að nýta tækifærið, heldur létu beinlínis í það að vinda ofan af því að tækifærið yrði nýtt og fara á svig við neyðarlögin,“ segir Sigmundur Davíð.

Órar og barnaskapur

Steingrímur J. Sigfússon segir að grundvallarmisskilningurinn og það sem felli málið strax á fyrstu metrunum hjá Víglundi sé að hann gangi út frá því að bráðabirgðaefnahagsreikningur bankanna haustið 2008 og lauslegt mat Fjármálaeftirlitsins á líklegu verðmæti þeirra eigna sem ákveðið hafi verið að færa í nýju bankanna á móti skuldum, séu endanlegar tölur. „Það liggur fyrir í þeirri ákvörðun FME að það er ekki. Framundan er að reyna að meta raunverulegt verðmæti eignanna sem voru færðar yfir til að mæta skuldum nýju bankanna. Og skuldir bankanna, það voru innstæðurnar okkar. Um leið og þetta liggur fyrir hrynur málflutningurinn til grunna.“

Hann segir að þetta sé algengur misskilningur sem einstöku stjórnmálamenn, þröngur hópur að vísu, hafi reynt að halda á lofti. Hann tengist þeim órum, að hrunið hafi verið hálfgerð blessun fyrir Ísland, sérstaklega fall bankanna, því þar hafi myndast svigrúm fyrir okkur til að græða nokkur hundruð milljarða. „Þetta er svo óskaplegur barnaskapur og misskilningur að það hálfa væri nóg,“ segir Steingrímur J. Sigfússon.

Víglundur Þorsteinsson segir hinsvegar að Steingrímur sé að reyna að afvegaleiða umræðuna. Matið á kröfum bankanna sé það sama og hann kynnti sjálfur í skýrslu til Alþingis árið 2011. Hann hafi ekki þorað að ræða við sig um þessi mál. Hann þurfi einfaldlega að svara því ásamt Össuri Skarphéðinssyni og Ögmundi Jónassyni, hvað mönnum gekk til á fyrstu vikum ríkisstjórnarinnar.