Boða aðgerðir gegn Evrópubúum sem slást í lið með öfgamönnum

Utanríkisráðherrar allra ríkja Evrópusambandsins hafa skuldbundið sig til að berjast sérstaklega gegn öfgamönnum úr röðum múslima sem hafa farið frá Evrópu til Sýrlands eða Íraks og snúið til baka.

Utanríkisráðherrar allra ríkja Evrópusambandsins hittust á sérstökum fundi í Brussel í dag til að ræða ástandið í austurhluta Úkraínu og möguleg viðbrögð við hryðjuverkaárásunum í París í síðustu viku.

Gera það sem þörf krefur

„Við erum öll ákveðin í að gera það sem þörf krefur til að halda Evrópu öruggri fyrir hryðjuverkaógninni. Í dag tölum við um vandann sem fylgir öfgasinnuðum íslamistum og hvernig við bregðumst við í vinnu okkar gegn hryðjuverkum. Við munum skoða tilteknar leiðir sem hjálpa okkur að gæta öryggis okkar, eins og farþegalista innan Evrópu. Það er mikilvægt,“ sagði Philip Hammond utanríkisráðherra Bretlands áður en fundurinn hófst í Brussel í dag í samtali við Reuters.

Athygli hefur vakið að Said og Cherif Kouachi, bræðurnir sem báru ábyrgð á árás á ritstjórnarskrifstofur Charlie Hebdo, hlutu þjálfun hjá Al-Kaída í Jemen og sneru svo aftur til Frakklands. Bæði frönsk og bandarísk stjórnvöld höfðu vitneskju um þetta. Á fundinum ræddu utanríkisráðherrarnir að innleiða þyrfti betri verklagsreglur við landamæraeftirlit aðildarríkjanna með það fyrir augum að taka harðar á borgurum ríkja ESB sem færu til dæmis til Sýrlands og Írak til að starfa við hliða öfgamanna og sneru svo aftur.

„Ég vona að Evrópuþingið breyti afstöðu sinni hvða það varðar og leyfi skráningu farþega innan Evrópu og einnig í samstarfi við aðra, eins og Bandaríkin og Kanada. Aðferðin er fyrst og fremst þessi skipti á upplýsingum,“ sagði Didier Reynders utanríkisráðherra Belgíu eftir fundinn. 



Stöðvuðu mótmælafund Pegida vegna hryðjuverkahættu

Í dag ákvað lögreglan í Saxlandi í Þýskalandi að banna mótmælafund Pegida hreyfingarinnar í Dresden, höfuðborg Saxlands vegna hryðjuverkaógnar. Pegida var stofnuð í október í fyrra og hefur það markmið að berjast gegn meintum íslömskum áhrifum í Evrópu.