Líkamsárás á Loftinu: Bent lét höggin dynja á stjórnarformanni ÍMARK

Ráðist var á Friðrik Larsen, stjórnarformann ÍMARK, á skemmtistaðnum Loftinu í Austurstræti þar sem fjölmargir aðilar úr auglýsingabransanum komu saman að lokinni ÍMARK-hátíðinni sem haldin var í Háskólabíói síðastliðið föstudagskvöld.

Samkvæmt upplýsingum fréttastofu var það leikstjórinn og tónlistarmaðurinn Ágúst Bent Sigbertsson sem réðist á Friðrik með nokkrum þungum höggum í andlitið. Fjölmenni var á staðnum og urðu margir vitni að árásinni. Friðrik, sem meðal annars hlaut áverka á andliti, hringdi sjálfur í lögreglu sem mætti á svæðið og fylgdi honum á slysadeild. Ágúst flúði af vettvangi.

Atvikið átti sér stað á þriðja tímanum aðfaranótt laugardags eftir að ÍMARK-hátíðinni lauk en það er einskonar uppskeruhátíð auglýsingabransans á Íslandi þar sem verðlaun eru veitt fyrir árangur nýliðins árs.

Hvorki hefur náðst í Friðrik né Ágúst vegna málsins. Samkvæmt heimildum Vísis hélt Friðrik af landi brott á laugardag.

Engin kæra lögð fram

Samkvæmt upplýsingum úr dagbók lögreglunnar frá því á laugardag var tilkynnt um líkamsárás á skemmtistað í miðbænum klukkan 03.08. Þar kom fram að árásaraðili hefði hlaupið af vettvangi en vitað væri hver hann er. Í dagbók lögreglunnar segir að fórnarlambið hafi verið flutt á slysadeild til skoðunar, en viðkomandi var með áverka í andliti.

Þórir Rúnar Geirsson hjá rannsóknardeild lögreglunnar segist ekki geta staðfest hverjir hafi verið aðilar að þeirri líkamsárás sem greint var frá í skýrslu lögreglu til fjölmiðla á laugardagsmorgun. Hann staðfesti hins vegar í samtali við Vísi að engin kæra hefði verið lögð fram vegna þeirrar líkamsárásar og sömuleiðis að ekki hefði verið tekin skýrsla af meintum árásarmanni.

Uppfært klukkan 15:26

Í upphaflegri útgáfu þessarar fréttar var fullyrt að Ágúst Bent hefði verið sakfelldur fyrir líkamsárás árið 2010. Líkamsárásin átti sér stað fyrir utan skemmtistaðinn Prikið árið 2008. Honum var hins vegar ekki gerð refsing fyrir verknaðinn í Hæstarétti vegna þess að brotið var talið fyrnt.