Matur

Fiskur og franskar með tartarsósu

Sjónvarpskokkurinn Eyþór Rúnarsson gefur gómsætar og auðveldar uppskriftir á Stöð 2 fram að jólum. 

Fiskur og franskar með tartarsósu

Ýsa í bjórdeigi

800 g ýsa

100 g gróft salt

200 g hveiti

4 g paprikuduft

4 g laukduft (blanda saman Öllum þurrefnum)

2 stk. sítróna



Stráið helmingnum af saltinu á bakka og leggið ýsuna ofan á það. Takið hinn helminginn af saltinu og dreifið yfir ýsuna. Látið saltið standa í 20 mín. Skolið saltið af ýsunni undir köldu vatni og þerrið hana með eldhúsbréfi. Skerið ýsuna í ca 30 gr steikur þvert á flakið. Veltið ýsunni upp úr hveiti og setjið hana svo í bjórdeigið og steikið í ca. 3 mín eða þar til hún er orðin gyllt og falleg á litinn. Setjið á grind og látið olíuna leka af henni. Berið fiskinn fram með sítrónubát.

Bjórdeig

550 g bjór

50 g vodka

400 g hveiti

10 g salt

10 g matarsódi

Sigtið öll þurrefnin saman í skál og blandið svo bjórnum og vodkanum smá saman út í og hrærið í á meðan.

Heimagerðar franskar

6 stk. bökunarkartöflur

4 lítrar af olíu til djúpsteikingar

sjávarsalt

svartur pipar

Skerið kartöflurnar í stórar franskar og setjið í sjóðandi vatn og sjóðið þar til þær eru alveg að verða soðnar í gegn. Setjið franskarnar á grind með bakka undir og inn í ísskáp. Látið kólna þar í 30 mín. Þetta er gert til að franskanar myndi húð að utan svo að þær verði stökkari. Takið franskarnar út úr ísskápnum og setjið í 130 gráðu heita olíu og steikið þær þar í 8 mín.

Setjið þær aftur á grind og látið olíuna leka af þeim. Setjið franskarnar því næst inn í frysti og frystið þær. Takið franskarnar út úr frystinum og látið standa út í ca 5 mín og setjið þær svo í 180 gráðu heita olíuna og steikið í ca 5 mín. Kryddið með saltinu og piparnum.

Tartarsósa með dilli

250 g majónes

50 g súrar smá gúrkur (smátt skornar)

40 g kapers

1 msk. skallotlaukur (fínt skorinn)

½ sítróna

Sjávarsalt

Svartur pipar

2 msk. gróft skorið dill

Setjið allt hráefnið saman í skál og blandið vel saman, Smakkið sósuna til með sítrónusafa og salti og pipar.






Velkomin á Vísi. Þessi vefur notar vafrakökur. Sjá nánar.