Ekkert til fyrirstöðu að Discover the World hefji áætlunaflug til Egilsstaða

Ferðaskrifstofan Discover the World áformar að bjóða upp á áætlunarflug á milli London og Egilsstaða næsta sumar. Gert er ráð fyrir að flogið verði alla sunnudaga frá og með 22. maí til 2. október.

Clive Stacey, framkvæmdastjóri ferðaskrifstofunnar, segir í samtali við Túrista að nauðsynlegt sé fyrir framgang málsins að Austfirðingar og aðrir Íslendingar nýti sér þennan nýja ferðamöguleika. Hann telur einnig að útlendingar sem nýti sér ferðirnar verði hrein viðbót við ferðamannastrauminn, sem nú þegar sé, og taki ekki viðskipti af öðrum.

Guðni Sigurðsson, upplýsingafulltrúi ISAVIA, segir flugvöllinn hafa alla burði til að taka á móti farþegunum. „Það þarf kannski smá fyrirvara til að gera allt klárt en þetta er auðvitað alþjóðaflugvöllur sem hefur allt til alls og þegar það er flug á áætlun þá er allt til staðar. Það þarf að vera tollur og öryggisleit og við erum með fólk sem er þjálfað í því. Svo fáum við lögreglu eða tollayfirvöld til að sjá um tollamál,“ segir Guðni í samtali við Vísi.

Sjá einnig: „Fólkið kemur ekki flugvallarins vegna“

Ríkið kemur til með að liðka til fyrir millilandaflugi frá Egilsstöðum og Akureyri með því að fella niður gjöld á flugfélög fyrstu tvö árin og aðstoða við markaðssetningu svæðanna með fjárframlögum. Forsætisráðherra skipaði starfshóp til að vega og meta kosti þess að millilandaflug um aðra flugvelli kæmist á laggirnar. Skýrsla hópsins sýndi fram á það að ríkið muni hagnast á millilandafluginu.

Kristján hjá Túrista ræddi málið í Bítinu í morgun.