Aðalmeðferð í þriðja sakamálinu gegn Kaupþingsmönnum frestað

Verjendur fá tíma til að kynna sér gögn sem sérstakur saksóknari lagði hald á í CLN-málinu svokallaða en vegna þessa hefur aðalmeðferð málsins sem átti að hefjast á morgun verið frestað um einn dag.

Hreiðar Már Sigurðsson, fyrrverandi forstjóri Kaupþings, Sigurður Einarsson, fyrrverandi stjórnarformaður bankans og Magnús Guðmundsson, fyrrverandi forstjóri Kaupþings í Lúxemborg, eru í málinu ákærðir fyrir umboðssvik en um er að ræða þriðja málið sem sérstakur saksóknari hefur höfðað gegn þeim. Þremenningarnir afplána nú allir þunga fangelsisdóma á Kvíabryggju vegna Al Thani-málsins.

Héraðsdómur Reykjavíkur féllst í  vikunni á kröfu verjenda í málinu um að fá aðgang að tölvupóstum tveggja nafngreindra aðila sem ákæruvaldið lagði hald á við rannsókn málsins en voru ekki lagðir fram fyrir dómi. Sérstakur saksóknari kærði úrskurðinn til Hæstaréttar en kærunni var vísað frá. Úrskurður héraðsdóms stendur því óraskaður.

Í málinu er þeim Hreiðari, Sigurði og Magnúsi gefið að sök að hafa misnotað aðstöðu sína sem stjórnendur Kaupþings í lánveitingum til nokkurra eignarhaldsfélaga sem voru í eigu vildarviðskiptavina bankans.

Lánin voru svo notuð til að kaupa skuldatryggingar Kaupþings banka, svokölluð Credit Linked Notes, með það fyrir augum að lækka skuldatryggingarála bankans í aðdraganda bankahrunsins árið 2008. Í ákærunni kemur fram að lánin hafi numið tugum milljarða króna.

Þremenningarnir neita allir sök.