Guðjón Árni aftur til Keflavíkur | Gerði tveggja ára samning

Guðjón Árni Antoníusson er genginn í raðir Keflavíkur á ný, en bakvörðurinn skrifaði undir tveggja ára samning við Keflavík í dag. Þetta kemur fram á vef Víkurfrétta. Þar kemur einnig fram að Guðjón muni ekki einungis leika með Keflvíkingum, heldur muni hann einnig sinna starfi styrktarþjálfara hjá liðinu.

Guðjón hefur leikið með FH síðastliðin þrjú ár og var um tíma fyrirliði liðsins. Hann varð Íslandsmeistari með Hafnarfjarðarliðinu 2012, en hann hefur verið mikið frá á undanförnum árum vegna höfuðmeiðsla.

Guðjón fylgir þar með í fótspor Hólmar Arnar Rúnarssonar sem færði sig einnig um set úr Hafnarfirðinum og til Keflavíkur eftir tímabilið.

Keflavík endaði í 8. sæti Pepsi-deildar karla á síðasta tímabili, en liðið ætlar sér eflaust mun stærri hluti á komandi tímabili.