Neymar upp á spítala?

Neymar, aðalstjarna brasilíska landsliðsins, var borinn af velli í kvöld þegar Brasilía vann 2-1 sigur á Kólumbíu í átta liða úrslitum HM í fótbolta.

Brasilíumenn fögnuðu sigrinum vel en nú tekur við óvissa um það hvort að Neymar verði leikfær í undanúrslitunum á móti Þýskalandi á þriðjudagskvöldið.

Neymar fékk mikið högg á bakið frá varnarmanni Kólumbíu og fyrstu fréttir frá Brasilíu herma að hann hafi verið fluttur á sjúkrahús.

Brasilíumenn verða án fyrirliðans Thiago Silva á móti Þýskalandi því hann er kominn í bann en nú snúast örugglega fréttir næstu daga frá Brasilíu um hvort Neymar geti spilað gegn Þýskalandi.

Eins og sjá má á þessum myndum hér fyrir neðan þá var Neymar sárþjáður eftir þetta brot Kólumbíumannsins Juan Camilo Zuniga.