Gifta sig berfætt á Bahamas

Stórleikarinn Johnny Depp, 50 ára, trúlofaðist leikkonunni Amber Heard, 27 ára fyrir stuttu. Þau kynntust á setti myndarinnar The Rum Diary og staðfestu samband sitt í júní árið 2012. 

Þau skipuleggja nú brúðkaupið en samkvæmt blaðinu Daily Star ætla þau að gifta sig á einkaeyju á Bahamas.

„Athöfnin verður lítil og þau ætla að vera berfætt. Eftir athöfnina verður grillveisla þar sem vinir Johnny troða upp og síðan verður limbókeppni. Hvorki Johnny né Amber vilja stóra Hollywood-veislu,“ segir heimildarmaður blaðsins.

Johnny var áður með leikkonunni Vanessu Paradis. Þau eiga saman tvö börn, dótturina Lily-Rose, sem er fjórtán ára og Jack, sem er ellefu ára.

Johnny og Amber munu deila hvíta tjaldinu seinna á þessu ári í myndinni London Fields. Meðal annarra leikara í myndinni eru Billy Bob Thornton og Jim Sturgess.