Kæmi Fowler ekki á óvart ef Suárez yrði seldur

Robbie Fowler, fyrrverandi leikmaður Liverpool, er kominn með nóg af hegðun Luis Suárez eftir að Suárez skaust enn einu sinni fram í sviðsljósið. Suárez sem er umdeildur karakter leikur með Liverpool og hefur átt erfitt með að halda sér frá forsíðum fjölmiðla.

Félagslið Suárez, Liverpool, hefur staðið með Úrúgvæanum í gegn um töluvert áreiti. Suárez var dæmdur fyrir kynþáttarníð og fékk átta leikja bann eftir atvik leik Liverpool og Manchester United árið 2011. Tveimur árum seinna var hann dæmdur í tíu leikja bann eftir að hafa bitið Branislav Ivanovic í leik Liverpool og Chelsea.

Suárez var mjög opinskár síðasta sumar um að hann vildi fara frá Liverpool og fannst mörgum hann sýna liðinu enga virðingu eftir að hafa staðið með honum. Það kæmi Fowler ekki á óvart ef liðið myndi reyna að selja hann í sumar eftir öll vandræðin sem hann hefur lent í undanfarin ár.

„Flestir stuðningsmenn liðsins elska hann sem leikmann en hann heldur sífellt áfram að draga nafn klúbbsins inn í allskonar vandræði. Félagið á meiri virðingu skilið eftir að hafa staðið með honum í gegnum súrt og sætt. Ég elska hann sem leikmann en það er ekki hægt að verja það sem hann gerði og það kæmi mér ekki á óvart ef félagið myndi selja hann í sumar,“ sagði Fowler.