Það sem börnin okkar þurfa frá grunnskólanum til þess að undirbúa þau fyrir sína framtíð

Hefur heimurinn breyst síðan þú varst barn? Heldurðu að veröldin verði önnur þegar barnið þitt tekur fyrstu skrefin á vinnumarkaðnum? Sem meðvitaðir og umhyggjusamir foreldrar hljótum við að spyrja hvers konar grunnskóli undirbúi börnin okkar sem best fyrir þennan ókomna nýja heim.

Fyrr á tímum var meginhlutverk almennra skóla grunnmenntun fyrir verksmiðjuvinnu, eins konar klónun sem sljóvgaði hæfnina til að hugsa sjálfstætt. Seinna meir bjuggu skólarnir fólk undir að velja sér sama starfið alla ævi.

En í heimi nútímans þurfa börnin okkar allt annað menntakerfi, því þau verða hvorki í færibandavinnu né í einu starfi fyrir lífstíð. Reyndar sýna nú sumar rannsóknir að meðalmanneskja í dag eigi sér þrjá mismunandi starfsferla, sem gera allt aðrar kröfur til fólks en menntakerfið hefur búið það undir.

Ég veit að það er fullt af dásamlegum breytingum innan hins hefðbundna menntakerfis alls staðar í heiminum. Margt hefur ratað í fjölmiðla, en ég er ekki viss um að það sé nóg, nógu fljótt. Svo ég vitni í sir Ken Robinson: Það er of seint að skólarnir þróist, við þurfum byltingu!

Atvinnuveitendur kvarta hástöfum yfir að geta ekki notað unga fólkið sem er að koma úr námi vegna þess að það er menntað fyrir heim sem ekki er til lengur. Unga fólkið er uppfullt af upplýsingum, flestum gagnslausum, en skortir verkfæri til þess að beita upplýsingunum á vegu sem hafa þýðingu og gagnast í starfi. Staðreyndin er sú að stúdentspróf og háskólagráður tryggja fólki ekki lengur starf, og má það sjá glöggt á vaxandi atvinnuleysi meðal ungs fólks víða í heiminum.

Hvað er það þá sem skólarnir verða að kenna börnunum okkar? Allavega þetta tvennt:

Sköpun. Sköpunarmáttur snýst ekki um list. Sköpunarmáttur er að geta komið fram með eitthvað nýtt, hugsað út fyrir rammann, sett saman gamlar upplýsingar á nýja vegu, að geta kannað möguleikana, að hugsa sjálfstætt. Í heiminum í dag gengur þeim vel sem geta aðlagast nýjum aðstæðum og fært fram eitthvað nýtt þegar heimurinn breytist. Þeir sem geta það ekki sitja eftir. Þannig er það, hvert svo sem starf þitt er. Eitt vinsælasta „TED-erindið” tekur á þessum vanda og ég hvet ykkur til að horfa á það.

Geta til að mennta og endurmennta sig. Heimurinn hefur breyst gífurlega, svo okkar hefðbundna menntakerfi verður að aðlagast og breytast. Skólarnir einblína enn á að koma inn upplýsingum, en það skiptir litlu í heimi nútímans, þar sem allar upplýsingar eru nú fáanlegar með einum smelli á takkaborðið. Hver man ekki eftir einhverjum tilgangslausum lærdómi sem maður varð að læra? Ég þurfti til dæmis að læra latínu í 9. bekk! Góður skóli kennir frekar börnunum að menntast alla ævi og að njóta þess að læra.

Þetta er auðvitað hægara sagt en gert og tekur mörg ár, því kennarar þurfa að endurmennta sig og námskráin að taka stakkaskiptum. Það sorglega við þetta allt saman er að þegar þeirri vinnu er lokið kann verkefnið að vera orðið úrelt vegna þess hve hratt heimurinn breytist.

Sköpunarmátturinn og getan til þess að mennta sig og endurmennta er aðeins tvennt af mörgu sem meðvitaðir foreldrar þurfa að hafa í huga þegar kemur að því að velja besta skólann fyrir börnin sín, miðað við niðurstöður nýjustu rannsókna á menntun.

Ef þig langar að vita meira ertu velkomin(n) að hlýða á fyrirlestur um „Þrjá mikilvægustu þætti sem foreldri þarf að hafa í huga þegar velja á grunnskóla”. Fyrirlesturinn fer fram á ensku í Waldorfskólanum í Lækjarbotnum þann 15. mars næstkomandi kl. 13.00.