Advania fær viðurkenningu sem fyrirmyndarfyrirtæki í góðum stjórnarháttum

Tíu íslensk fyrirtæki hafa fengið viðurkenningu sem Fyrirmyndarfyrirtæki í góðum stjórnarháttum.

Fyrirtækin eru Advania, Vátryggingarfélag Íslands, Íslandsbanki, Mannvit, Icelandair Group, Landsbréf, Íslandssjóðir, Íslandspóstur, Lánasjóður sveitarfélaganna og Stefnir.

Viðskiptaráð Íslands, Nasdaq OMX Iceland, Samtök atvinnulífsins og Rannsóknarmiðstöð í stjórnarháttum við Háskóla Íslands standa að viðurkenningunni. Fyrirtækin hafa farið í gegnum úttektarferli á stjórnarháttum sem sérstakir úttektaraðilar (Lex lögmannsstofa, Deloitte, KPMG o.fl.) hafa leitt út frá verklagi sem Rannsóknarmiðstöðin hefur hannað í samræmi við Leiðbeiningar um stjórnarhætti fyrirtækja.

Rannsóknarmiðstöð í stjórnarháttum við Háskóla Íslands rýnir niðurstöðurnar og gerir samantekt á niðurstöðum um stjórnarhætti félagsins. Samantektirnar má nálgast á vef Viðskiptaráðs Íslands.

Þann 11. mars nk. kl. 9 – 12, munu fyrirtækin fá afhentar viðurkenningar sem Fyrirmyndarfyrirtæki í góðum stjórnarháttum á ráðstefnu sem ber heitið: Fyrirmyndarfyrirtæki í góðum stjórnarháttum.

Ragnheiður Elín Árnadóttir, iðnaðar- og viðskiptaráðherra, mun opna ráðstefnuna með ávarpi og aðalræðumaður verður prófessor David Beatty, Conway Director hjá Clarkson Centre for Business Ethics and Board Effectiveness við Rotman School of Management í Kanada.

Fulltrúar þriggja fyrirtækja munu halda erindi um stjórnarhætti, þau Hrund Rudolfsdóttir í stjórn Stefnis, Úlfar Steindórsson í stjórn Icelandair Group, og Jón Már Halldórsson í stjórn Mannvits.

Forstöðumaður Rannsóknarmiðstöðvar í stjórnarháttum við Háskóla Íslands, Dr. Eyþór Ívar Jónsson hefur bent á að þetta framtak leggur áherslu á hve mikilvægt er að viðskiptalífið leiði umbætur á góðum stjórnarháttum á Íslandi.