Fyrsti sigurinn hjá Hannesi í atvinnumennsku

Hannes Þór Halldórsson, markvörður íslenska landsliðsins í fótbolta, vann í kvöld sinn fyrsta deildarsigur með liði sínu Sandnes Ulf. Sandnes Ulf vann þá 2-1 heimasigur á Stabæk í norsku úrvalsdeildinni í fótbolta.

Sandnes Ulf var aðeins búið að ná í tvö stig út úr fyrstu fimm leikjum sínum en komst upp úr fallsæti með þessum flotta sigri. Hannes kom til liðsins frá KR þar sem hann varð Íslandsmeistari í annað skiptið á þremur árum síðasta haust.

Diego Rubio skoraði sigurmark Sandnes Ulf á 76. mínútu en Fredrik Midtsjø hafði komið Sandnes Ulf í 1-0 á 9. mínútu leiksins. Franck Boli jafnaði fyrir Stabæk á 62. mínútu.

Birkir Már Sævarsson og félagar í Brann töpuðu á sama tíma 1-3 á heimavelli á móti Haugesund. Brann komst í 1-0 á 27. mínútu leiksins en fékk síðan á sig þrjú mörk frá 40. til 50. mínútu. Christian Gytkjær skoraði öll þessi mörk en það fyrsta kom úr vítaspyrnu.