Sitja uppi með óseldar gærur fyrir yfir 200 milljónir króna

„Það er sölutregða og við getum áætlað að heildarverðmæti óseldra gæra í landinu nemi meira en 200 milljónum króna,“ segir Gunnsteinn Björnsson, framkvæmdastjóri Loðskinns á Sauðárkróki, spurður hvernig sláturleyfishöfum gangi að selja sauðargærur úr landi.

Gunnsteinn segir innflutningsbann Rússa, sem gildir gagnvart flestum ríkjum Evrópu, skýra að mestu hversu illa gengur að selja vöruna.

„Eftirspurnin er einnig minni en oft áður í augnablikinu. En sölutregðan stafar mikið af Úkraínudeilunni því Rússland er risastór markaður fyrir unnar gærur en þær hafa hingað til farið héðan til landa eins og Frakklands og Ítalíu. Kaupendur þar hafa átt í erfiðleikum með að selja vörurnar til Rússlands og það hefur leitt til lausafjárskorts hjá þeim.“

Samkvæmt upplýsingum frá Kaupfélagi Skagfirðinga (KS) á fyrirtækið enn um 60 þúsund óseldar gærur. Gunnsteinn nefnir einnig önnur fyrirtæki eins og Norðlenska, Sláturfélag Suðurlands (SS), og SAH afurðir á Blönduósi. „Það eiga allir eitthvað en Norðlenska og SS eiga sennilega minnst. Við höfum séð um að salta gærur fyrir þrjú fyrirtæki og þær eru geymdar hér hjá okkur.“

Varan er að sögn Gunnsteins seld til Evrópu og Tyrklands, á undir eitt þúsund krónur stykkið, þar sem gæran fer í framleiðslu á mokkaskinni eða leðri.

„Við höfum reynt að selja sem allra mest af okkar skinnum í mokkaframleiðslu því það gefur hærra verð en það er alltaf eitthvað sem fer í leður.“ Í fyrra seldust að sögn Guðsteins allar þær gærur sem fyrirtækin áttu eftir sláturtíðina 2013.

„Ég hef ekki áhyggjur af því að þetta seljist ekki en þetta mun taka lengri tíma en venjulega. Maður er því ekkert orðinn stressaður enn þá en þessi óvissa sem hefur myndast gerir það að verkum að kaupendurnir fara mjög varlega.“