Milljarða aukning í september

Erlend greiðslukortavelta í september nam 9,4 milljörðum sem er tæplega tveggja milljarða aukning samanborið við sama mánuð í fyrra. Þetta má lesa úr tölum Rannsóknarseturs verslunarinnar.

Mestu fé vörðu ferðalangar í gistiþjónustu eða um tveimur milljörðum. Það er fjórðungsaukning frá september í fyrra. Mest var aukningin í sölu á hinum ýmsu skoðunarferðum eða 58,6 prósent.

Meðalferðamaðurinn greiddi 106 þúsund krónur með korti sínu sem er 2,5 prósenta aukning eftir að verðhækkanir eru teknar með í reikninginn. Ferðalangar frá Sviss greiddu að jafnaði hæstu upphæðirnar með greiðslukortum sínum, 176 þúsund krónur, en Norðmenn eyddu næstmest. Pólverjar og Japanar ráku lestina.

Tölur þessar taka ekki til kaupa á þjónustu sem ekki fer í gegnum íslenska færsluhirða. Ýmsar greiðslur, til að mynda vegna erlendra ferðaþjónustuaðila eða annarra milliliða, eru því ekki teknar með í reikninginn.